Senatning Fan, taʼlim va sogʻliqni saqlash masalalari qoʻmitasi tomonidan parlament nazorati doirasida Toshkent viloyatidagi umumtaʼlim maktablarida yaratilgan sharoitlar va taʼlim sifatini oshirish borasidagi ishlar oʻrganilmoqda.

Jumladan, senator Gulnora Marufova rahbarligidagi ishchi guruh Olmaliq, Yangiyoʻl shaharlari hamda Piskent va Yangiyoʻl tumanlaridagi bir qator maktablar faoliyati bilan tanishdi.

Oʻrganishlar davomida sinflarda oʻquvchilar sonining meʼyorga muvofiqligi, inklyuziv taʼlim qamrovi, pedagog kadrlar salohiyati va zamonaviy pedagogik texnologiyalardan foydalanish masalalariga eʼtibor qaratildi.

Shuningdek, darsliklar bilan taʼminlanish, qoʻshimcha taʼlim imkoniyatlari, olimpiadalarda ishtirok etish koʻrsatkichlari, oliy oʻquv yurtlariga kirish natijalari ham tahlil etildi.

Bundan tashqari, maktab binolarining moddiy-texnika bazasi, sport va oshxona infratuzilmasi, isitish-yoritish tizimi, tibbiy xizmat koʻrsatish hamda byudjet mablagʻlaridan samarali foydalanish masalalari oʻrganildi.

Oʻrganish natijasida qator ijobiy koʻrsatkichlar qayd etildi, mavjud kamchiliklarni bartaraf etish yuzasidan tegishli tavsiyalar berildi.