Bugun, 2-sentabr kuni Oʻzbekiston Respublikasi Oliy Majlisi Senati Raisi Tanzila Narbayeva boshchiligidagi parlament delegatsiyasi Belarus Respublikasi Vitebsk shahriga rasmiy tashrif bilan keldi.

Tashrif doirasida Oliy Majlis Senati Raisi Tanzila Narbayevaning Belarus Respublikasi Milliy majlisi Respublika Kengashi Raisi Natalya Kochanova bilan uchrashuvi oʻtkaziladi.

Shuningdek, tashrif davomida qator muhim tadbirlar tashkil etiladi. Jumladan, Oʻzbekiston Respublikasi Oliy Majlisi Senati va Belarus Respublikasi Milliy majlisi Respublika Kengashi oʻrtasida hamkorlik boʻyicha komissiyaning ilk majlisi va “Oʻzbekiston – Belarus: hamkorlik barqaror rivojlanish omili sifatida” mavzusida Oʻzbekiston va Belarus tadbirkor ayollarining uchinchi biznes-forum yalpi majlisi boʻlib oʻtadi.

Oʻzbekiston va Belarus tadbirkor ayollarining uchinchi biznes-forumi doirasida yettita seksiya tashkil etiladi, ularda forum ishtirokchilari sanoat va ijtimoiy-iqtisodiy sohadagi hamkorlikdan tortib mahalliy vakillik organlari va yoshlar hamkorligigacha boʻlgan keng koʻlamli masalalarni muhokama qiladilar.

Tashrif doirasida yana bir muhim tadbir – Vitebsk shahrida tashkil etiladigan “Made in Uzbekistan” milliy koʻrgazmasidir. Unda oziq-ovqat, farmatsevtika, yengil sanoat, turizm, hunarmandchilik va elektron texnika kabi sohalarda faoliyat yuritayotgan 70 dan ziyod tadbirkor ayollar oʻz mahsulot va xizmatlarini namoyish etadilar.