Foto: Shavkat AKRAMOV.

Samarqand davlat universitetida Oʻzbekiston – Italiya universitetlari rektorlarining uchrashuvi boʻlib oʻtdi. Oliy taʼlim, fan va innovatsiyalar vaziri Qoʻngʻirotboy Sharipov, Samarqand davlat universiteti rektori, Oʻzbekiston Respublikasi fan arbobi, Oliy Majlis Senati aʼzosi Rustam Xolmurodov, Qishloq xoʻjaligi vaziri oʻrinbosari Alisher Shukurov, Oʻzbekistonning Italiyadagi Favqulodda va muxtor elchisi Abat Fayzullayev va boshqa oliy taʼlim muassasalari rahbarlari ishtirok etdi.

Italiyaning Oʻzbekistondagi Favqulodda va muxtor elchisi Piyergabriyele Papadia de Bottini, Perujia xorijliklar universiteti rektori Valerio De Chezaris, Tushia universiteti rektori Stefano Ubertini, Roma Tre universiteti rektori Massimiliano Foruchchi, Piza universitetining prorektori Filippo Jorji hamda Trento universiteti prorektori Marko Ragassi oʻz maʼruzalari bilan qatnashdi.

Oliy taʼlim, fan va innovatsiyalar vaziri Qoʻngʻirotboy Sharipov oʻz nutqida Oʻzbekiston va Italiya oʻrtasidagi taʼlim sohasidagi aloqalarning yangi bosqichga koʻtarilayotgani, ayniqsa, universitetlar oʻrtasidagi toʻgʻridan-toʻgʻri hamkorliklarning ahamiyatiga alohida urgʻu berdi.

Tadbir doirasida 10 ga yaqin oliy taʼlim muassasalari oʻrtasida hamkorlik shartnomalari imzolandi. Jumladan, Samarqand davlat universiteti bilan Italiyaning Trento universiteti hamda Venetsiyadagi nufuzli Ka Fossari universiteti oʻrtasida hamkorlik boʻyicha memorandumlar imzolandi.

Mazkur uchrashuv ikki davlat oʻrtasidagi taʼlim aloqalarini yanada mustahkamlash, talabalar almashinuvi, qoʻshma ilmiy tadqiqotlar va innovatsion loyihalarni yoʻlga qoʻyishda muhim qadam boʻldi.