Videodan kadr

Samarqand shahrida gaz portlashi oqibatida 6 kishi halok boʻldi. Bu haqda viloyat Favqulodda vaziyatlar boshqarmasi xabar berdi.

Qayd etilishicha, bugun, 9-may kuniga oʻtar kechasi Samarqand viloyati Samarqand shahar “Bogʻisaroy” MFY Spitamen koʻchasida joylashgan uylarning birida gaz-havo aralashmasining chaqnashi sodir boʻlgan. Hodisa yuzasidan FVBga maʼlumot kelib tushganidan soʻng, yongʻin-qutqaruv ekipajlari voqea joyiga yetib borib, baxtsiz hodisa oqibatlarini bartaraf etishga kirishgan.

Chaqnash oqibatida hosil boʻlgan kinetik zarbadan uyning temir-beton konstruksiyalari qulab tushgan. Portlash tufayli 3 qavatli uyning barcha qavatlari va yertoʻla qismi zararlangan. Yongʻin sodir boʻlmagan.

Olib borilgan harakatlardan soʻng, vayronalar ostidan 6 nafar fuqaroning jasadi topilgan.

Favqulodda vaziyatlar vazirligi ishchi guruhi rahbarligida Samarqand viloyati FVB boshligʻi, prokuratura, Ichki ishlar boshqarmasi, Sogʻliqni saqlash boshqarmasi, Milliy gvardiya, “Hududgaztaʼminot” xizmatlaridan tezkor shtab tuzilib, vaziyat oqibatlarini bartaraf etish ishlari olib borilmoqda. Bunga 10 ta asosiy va maxsus yongʻin-qutqaruv texnikalar va Favqulodda vaziyatlar davlat tizimining kuch vositalari jalb etilgan.

Hozirda mazkur holat yuzasidan dastlabki tergovoldi surishtiruv ishlari olib borilmoqda.