Abdulaziz YOʻLDOSHEV/“Xalq soʻzi”. Xalqaro xotin-qizlar kuni munosabati bilan oʻtkazilayotgan va umumiy sovrin jamgʻarmasi 50 ming AQSH dollari boʻlgan “Womenʼs Chess Championship” xalqaro turnirida 13 davlatdan 150 nafar jahon shaxmatining ayol ustalari ishtirok etmoqda.

Musobaqa ochilishida soʻz olgan Oʻzbekiston shaxmat federatsiyasi raisi oʻrinbosari Komil Sindorov, viloyat hokimining oʻrinbosarlari Rustam Qobilov va Husan Toʻxtayev turnir ishtirokchilariga muvaffaqiyat tiladi. Mazkur turnir 2026-yil mamlakatimizda, jumladan, Samarqandda boʻlib oʻtadigan 46-Butunjahon shaxmat olimpiadasiga tayyorgarlik koʻrish, ayol(qiz)lar shaxmatini rivojlantirish, milliy terma jamoa aʼzolarining mahoratini oshirish hamda xorijlik mahoratli shaxmatchilar bilan oʻzaro tajriba almashish imkonini berishi taʼkidlandi.

Musobaqada oʻzbekistonlik reytingi yuqori shaxmatchilardan Umida Omonova, Barchinoy Shokirjonova, Afruza Hamdamova, Marjona Malikova hamda Nodira Nodirjonova gʻoliblikka asosiy daʼvogar sifatida yurtimiz sharafini himoya qilmoqda.

Bahslar FIDE qoidalari asosida ayol(qiz)lar oʻrtasida ikki guruhda — “A” guruhida 1800 va undan yuqori reytingli ishtirokchilar, “B” guruhida reytingi 2000 va undan past boʻlgan shaxmatchilar qatnashmoqda.

Musobaqa nizomiga koʻra, turnir shveysar tizim standart yoʻnalishida 9 turda oʻtkaziladi. Har bir ishtirokchiga 90 daqiqadan vaqt beriladi va birinchi yurishdan boshlab har bir yurishga 30 soniyadan vaqt qoʻshib boriladi. 30 yurishgacha durangga kelishish mumkin emas. Turga maksimal kechikish vaqti 15 daqiqa. Ketma-ket ikki turga kelmagan ishtirokchilar musobaqadan chetlatiladi.

Turnir 19-martga qadar davom etadi.