Abdulaziz YOʻLDOSHEV/“Xalq soʻzi”. Azim kentda “Sharq taronalari” XIII xalqaro musiqa festivali sadolari tinmasdan turib bayram-bayramga ulashdi. Mamlakatimiz mustaqilligining 33 yilligi Samarqand viloyatida ham keng nishonlanmoqda.

Istiqlolimizning asosiy bayram tantanalari Samarqand shahridagi “Moʻjiza” amfiteatri va Qorasuv massividagi “Yangi Oʻzbekiston” bogʻida boʻlib oʻtdi. Har ikki hudud eng ulugʻ, eng aziz bayramimizga mos qilib bezatilgan. Amfiteatr maydonida sahnalashtirilgan tomoshalar oʻziga xos tarzda namoyish etildi.

“Bir boʻlsak – yagona xalqmiz, birlashsak – Vatanmiz!” degan ezgu gʻoyani oʻzida mujassam etgan bayram dasturlarida yurtimizdagi tinchlik-xotirjamlik va millatlararo totuvlik, ulkan bunyodkorlik ishlari, buyuk ajdodlarimizning maʼnaviy merosi va bugungi yosh avlodning bilim choʻqqilarini egallash borasidagi yutuqlari, sportchilarimiz erishayotgan natijalar badiiy chiqishlar orqali ifodalandi.

Samarqand viloyati hokimi E.Turdimov tadbir ishtirokchilari va ular orqali butun viloyat ahlini eng ulugʻ, eng aziz bayram bilan tabrikladi.

Mustaqilligimizning 33 yilligi munosabati bilan Prezidentimiz farmonlariga koʻra, turli sohalarda faol mehnat qilayotgan, oʻzining tashabbuskorligi va fidoyiligi bilan boshqalarga ibrat boʻlayotgan bir guruh samarqandliklar davlat mukofotlari bilan taqdirlangani ham barchani cheksiz quvontirdi.

Poytaxtdan kelgan va samarqandlik sanʼatkorlarning Vatanni, tinchlik va osoyishtalikni madh etuvchi qoʻshiqlari bayram qatnashchilari kayfiyatiga koʻtarinkilik ulashdi.

Har ikki manzilda tadbirlar mushakbozlik bilan yakunlandi.