Oʻzbekiston Respublikasi Prezidenti Shavkat Mirziyoyevning yordamchisi Saida Mirziyoyeva Yevropa Ittifoqining Markaziy Osiyo boʻyicha maxsus vakili Eduards Stiprays bilan uchrashuv oʻtkazdi. Bu haqda Mirziyoyeva oʻz Telegram kanalida maʼlum qilgan.

Maʼlum qilinishicha, muloqot chogʻida Oʻzbekiston va Yevropa Ittifoqi oʻrtasidagi hamkorlikni yana-da mustahkamlash masalalari ochiq va doʻstona muhokama qilingan.

Tomonlar Yevropa Ittifoqi bilan aloqalarni yanada chuqurlashtirish, jumladan, mintaqaviy tashabbuslarni rivojlantirish boʻyicha oʻzaro fikr almashishdi. Xususan, ayollar tadbirkorligini rivojlantirish, taʼlim sohasini qoʻllab-quvvatlash, suv resurslarini boshqarish va mintaqalararo aloqalarni kengaytirish kabi yoʻnalishlar alohida eʼtiborda boʻldi.

Eduards Stipraysning Markaziy Osiyo mintaqasi bilan bogʻliq boy tajribasi hamkorlikni mustahkamlashga katta hissa qoʻshishiga ishonch bildirildi. Tomonlar konstruktiv va ochiq muloqotning dolzarb masalalarni hal etishda muhim vosita ekanini taʼkidladi.

“Janob Stipraysning mintaqamiz bilan bogʻliq boy kasbiy tajribasi sheriklikni mustahkamlashga xizmat qilishiga ishonamiz. Ochiq va konstruktiv muloqot uchun minnatdorlik bildiramiz”, deb yozgan Prezident yordamchisi.