Ўзбекистон Республикаси Президенти Шавкат Мирзиёевнинг ёрдамчиси Саида Мирзиёева Европа Иттифоқининг Марказий Осиё бўйича махсус вакили Эдуардс Стипрайс билан учрашув ўтказди. Бу ҳақда Мирзиёева ўз Телеграм каналида маълум қилган.

Маълум қилинишича, мулоқот чоғида Ўзбекистон ва Европа Иттифоқи ўртасидаги ҳамкорликни яна-да мустаҳкамлаш масалалари очиқ ва дўстона муҳокама қилинган.

Томонлар Европа Иттифоқи билан алоқаларни янада чуқурлаштириш, жумладан, минтақавий ташаббусларни ривожлантириш бўйича ўзаро фикр алмашишди. Хусусан, аёллар тадбиркорлигини ривожлантириш, таълим соҳасини қўллаб-қувватлаш, сув ресурсларини бошқариш ва минтақалараро алоқаларни кенгайтириш каби йўналишлар алоҳида эътиборда бўлди.

Эдуардс Стипрайснинг Марказий Осиё минтақаси билан боғлиқ бой тажрибаси ҳамкорликни мустаҳкамлашга катта ҳисса қўшишига ишонч билдирилди. Томонлар конструктив ва очиқ мулоқотнинг долзарб масалаларни ҳал этишда муҳим восита эканини таъкидлади.

“Жаноб Стипрайснинг минтақамиз билан боғлиқ бой касбий тажрибаси шерикликни мустаҳкамлашга хизмат қилишига ишонамиз. Очиқ ва конструктив мулоқот учун миннатдорлик билдирамиз”, деб ёзган Президент ёрдамчиси.