Rossiyaning Rostov viloyatida 2026-yildan boshlab xorijiy ishchilar uchun patent narxi oshiriladi. Bu haqda RIA Novosti hudud hukumatiga tayanib xabar berdi.

— Rostov viloyatida 2026-yilda xorijlik ishchilar uchun patent narxi hududiy koeffitsiyentning oshirilishi hisobiga koʻtariladi, — deyiladi xabarda.

Patent olish — vizasiz tartibda hududga kirib kelgan barcha xorijliklar, jumladan, Oʻzbekiston fuqarolari uchun majburiy.

Patent toʻlovi bazaviy stavka, deflyator koeffitsiyenti va hududiy koeffitsiyentdan tashkil topadi. Rostov viloyatidagi hududiy koeffitsiyent mamlakatdagi eng past koʻrsatkichlardan biri — 2,1 hisoblanadi.

Viloyatda ushbu koeffitsiyentni 2,1 dan 3 ga oshirish taklif qilinmoqda. Bu orqali viloyat byudjetiga qoʻshimcha taxminan 1 milliard rubl tushishi kutilmoqda.

Baʼzi deputatlarning fikricha, patent narxining oshishi chet ellik ishchilar oqimining kamayishiga, yirik korxonalarda ishchi kuchining yetishmasligiga olib kelishi mumkin. Gubernator Yuriy Slyusar esa bunday vaziyatga yoʻl qoʻymaslik uchun mintaqaviy iqtisodiy rivojlanish vazirligiga qoʻshimcha mexanizmlarni ishlab chiqishni topshirgan.