“Kursk uchun qasos”: Rossiya dahshatli hujumga tayyorlanyaptimi?

AQSH rasmiylariga koʻra, Rossiya Ukrainaning Rossiya hududidagi hujumiga javob berish uchun oʻz harbiy kuchlarining bir qismini Ukrainadan olib chiqmoqda. Bu Moskvaning oʻz hujum strategiyasini oʻzgartirishga majbur qilgan birinchi voqeadir.

“Wall Street Journal” nashrining yozishicha, Ukraina Rossiyaning Kursk viloyatiga uyushtirgan hujumidan soʻng rus qoʻshinlari kattaroq hujumga tayyorgarlik koʻrish uchun qisman chekingan. AQSH rasmiylariga koʻra, Rossiya prezidenti Vladimir Putin oʻz harbiylariga Ukraina qoʻshinlarini ortga qaytarishni buyurgan, biroq hozircha Moskva kuchli javob zarbasini berishdagi tashkiliy ishlarni rejalashtirishda qiynalmoqda.

Ukraina oliy harbiy qoʻmondoni, general-polkovnik Aleksandr Sirskiyning maʼlum qilishicha, Ukraina kuchlari Rossiyaning 74 ta shaharcha va qishloqlarini nazorat ostiga olgan. Kiyev ushbu amaliyotdan maqsad Rossiya Ukrainaga qarshi urush olib borishda foydalanayotgan logistika va infratuzilmani buzish ekanligini aytgan.

Qoʻmondonning aytishicha, bugungi kun boshidan beri maʼlum yoʻnalishlarda qoʻshinlar 1 kilometrdan 2 kilometrgacha oldinga siljidi. Sudjada dushmanni qidirish va yoʻq qilish ishlari yakunlandi. Shuningdek, 100 ga yaqin dushman harbiylari asirga olindi.

Ukrainaning Kurskka kirishiga javoban, Rossiya ushbu viloyati mudofaasini qayta toʻplash va mustahkamlashni boshladi. Vladimir Zelenskiy esa oʻz askarlarining saʼy-harakatlarini yuqori baholab, ular Ukraina mustaqilligini himoya qilishda jasorat koʻrsatganini bildirgan.

Tahlilchilarning ogohlantirishicha, Ukraina taʼminot liniyalari choʻzilgan sari operatsiyani davom ettirish qiyinlashishi mumkin. Bu esa rus armiyasining oʻz harbiy qudratini qayta tiklab olishiga yordam berishi ham taxmin qilinmoqda.

“Rossiyaning reaksiyasi Ukraina pozitsiyalarini kuchli bombardimon qilishni oʻz ichiga oldi, ammo Ukraina qoʻshinlari oʻz pozitsiyalarini saqlab qolishi ham mumkin”, deb yozadi nashr oʻz maqolasida. Hozircha razvedka xizmatlari ikkala tomonning ham harakatlari yuzasidan aniq maʼlumotlarni taqdim etmagan.

Yaponiya Bosh vaziri isteʼfoga chiqishini aytdi

Yaponiya Bosh vaziri Fumio Kishida kelasi oyda boʻlib oʻtadigan partiyaviy soʻrovlarda hukmron Liberal-demokratik partiya (LDP) yetakchisi sifatida qayta saylanish uchun kurashmasligini maʼlum qildi.

Chorshanba kuni Tokioda boʻlib oʻtgan matbuot anjumanida Kishida LDP boshqaruvida yangi yetakchi paydo boʻlishi vaqti kelganini va ularning rahbariyatini toʻliq qoʻllab-quvvatlashini aytdi.

“Ushbu saylovda xalqqa partiya oʻzgarib borayotganini koʻrsatish kerak, buning uchun shaffof va ochiq saylovlar, erkin hamda qizgʻin bahs-munozaralar muhim ahamiyatga ega. LDP oʻzgarishini koʻrsatishning eng aniq birinchi qadami mening chetga chiqishimdir. Boʻlajak saylovlarda ishtirok etmayman”, degan Kishida jurnalistlarga.

Kishida 2021-yil sentyabrida uch yillik muddatga partiya prezidenti etib saylangan va koʻp oʻtmay umumiy saylovda gʻalaba qozongan edi.

Uning isteʼfosi partiyaning “Birlashma” cherkovi bilan aloqalari borligi, pul mablagʻlari bilan bogʻliq mojarolar va inflyatsiya bilan bogʻliqligi aytilmoqda.

Keyingi partiya yetakchisi Bosh vazir lavozimini egallashi bilan bir qatorda yechimini kutayotgan muammolarni ham boʻyniga olishga tayyor turishi kerak.

Mamlakatning asosiy muxolifat partiyasi Konstitutsiyaviy-demokratik partiyasi yetakchisi Kenta Izumi Kishida uchun muammo tugʻdirgan masalalar hal boʻlmaganini taʼkidladi.

Masalan, Kishida davrida Yaponiya 2027-yilga borib NATO standarti boʻlgan yalpi ichki mahsulotning ikki foiziga teng boʻlgan mudofaa xarajatlarini ikki baravar oshirishga vaʼda bergan. Bu Xitoyning Osiyo-Tinch okeanida tobora kuchayib borayotgan pozitsiyasidan xavotirda boʻlgan Qoʻshma Shtatlar tomonidan qoʻllab-quvvatlangan yillar davomidagi qatʼiy patsifizmdan burilish boʻldi. Ikki mamlakat hamkorlikda yangi davr boshlanganini eʼlon qildi. Kishida aprel oyida AQSHga tashrif buyurgan edi.

Shu qatorda iyul oyida Yaponiya va Filippin bir-birining hududiga qoʻshinlarni joylashtirishga ruxsat beruvchi mudofaa shartnomasini imzolagandi.

Isroil urushi uchun 20 milliard AQSH dollari

Yaqin Sharqdagi taranglik fonida AQSH Isroilga 20 milliard dollarlik qurol-yarogʻ ajratilishini eʼlon qildi. “Qoʻshma Shtatlar Isroil xavfsizligiga sodiqdir va uning mudofaa qobiliyatini qoʻllab-quvvatlash AQSH milliy manfaatlari uchun juda muhimdir”, dedi Davlat departamenti.

Buyurtmaga “Boeing” tomonidan ishlab chiqarilgan F-15 qiruvchi samolyotlari, oʻrta masofaga uchuvchi ilgʻor havo-havo raketalari, 120 millimetrli tank oʻq-dorilari va yuqori portlovchi minomyotlar hamda taktik mashinalar kiradi.

Baʼzi qurollar, jumladan, 50 dan ortiq qiruvchi samolyotlarni yetkazib berish bir necha yil talab qilishi mumkin. 33 mingta tank snaryadlari va 50 mingta portlovchi minomyot patronlari kabi boshqa jihozlar tez orada yetib kelishi mumkin.

Qoʻshma Shtatlarning taʼkidlashicha, tank snaryadlari Isroilning joriy va kelajakdagi dushman tahdidlariga qarshi turish qobiliyatini yaxshilaydi, vatan mudofaasini mustahkamlaydi va mintaqaviy tahdidlarga toʻsqinlik qiladi.

AQSH Isroilni Gʻazoda oʻt ochishni toʻxtatish kelishuvini imzolashga majburlash huquqiga ega. Buning oʻrniga Qoʻshma Shtatlar mintaqa boʻylab millionlab odamlarni kulga aylantirishi mumkin boʻlgan olovga benzin quymoqda, deb biladi Amerika-Islom munosabatlari kengashi vakili.

Shuningdek, ularning aytishicha, Isroil hukumati nafaqat Gʻazoda Falastin xalqiga nisbatan shafqatsiz genotsidni davom ettirish, balki kengroq mintaqaviy urushni qoʻzgʻatish niyatida ekanligini qayta-qayta namoyish etdi. Bayden maʼmuriyati haqiqatdan uygʻonish vaqti kelgan.

Isroil Gʻazoning markaziy va shimoliy hududlarini nishonga olgan tong oldi hujumlarida kamida 16 kishi halok boʻlgan. Bu haqda “Al Jazeera” nashri xabar berdi. Isroil harbiylari 24 soat ichida Gʻazodagi 40 ta hududga zarba berganini daʼvo qilmoqda. Yahudiy davlati askarlari havo kuchlari koʻmagida oʻtgan kun davomida koʻp sonli jangchilarni oʻldirgan hamda Gʻazo janubi va markazida HAMAS harbiy infratuzilmasini vayron qilgan.