Kecha, 9-noyabr kuni Ispaniya La Ligasining 12-tur oʻyinlari boʻlib oʻtdi. Kun doirasidan oʻrin olgan bahsda “Real Madrid” klubi “Rayo Valekano” mehmoni boʻldi.

Uchrashuvda golsiz durang qayd etildi. Taʼkidlash joizki, “qirollik klubi” Ispaniya chempionatida oʻtgan soʻnggi 4 ta oʻyinda ketma-ket gʻalabani qoʻlga kiritgan edi.

Shuningdek, “Real Madrid” bu yil Ispaniya chempionatida birinchi marta bahsni golsiz yakunladi. Xabi Alonso shogirdlari oʻtgan 11 ta uchrashuvning barchasida raqib darvozasini kamida bir bor ishgʻol etishni uddalagan edilar.

Maʼlumot uchun, “Real Madrid” jamoasi navbatdagi oʻyinini 24-noyabr kuni “Elche” klubiga qarshi oʻtkazadi.

Ispaniya La Ligasining 12-tur oʻyinlari doirasidan oʻrin olgan yana bir bahsda “Selta” jamoasi oʻz maydonida “Barselona”ni qabul qildi.

Uchrashuv “kataloniyaliklar”ning 4:2 hisobi­dagi gʻalabasi bilan yakunlandi. “Barselona” jamoasining gоllariga Robert Levandovski (3 ta) va Lamin Yamal mualliflik qildi. “Vigoliklar”ning javob gоllari esa Serxio Karreyra va Borxa Iglesiaslar hisobiga yozildi.

Mazkur bahsda “koʻk-anorranglilar”ning polyak hujumchisi Robert Levandovski 1-yilu 4 kundan soʻng yana xet-trikka erishishni uddaladi. Oʻyinda gʻalaba qozongan “Barselona” esa “Real Madrid” bilan orasidagi farqni 2 ochkoga qisqartirishni uddaladi.

Maʼlumot uchun, Kataloniya klubi keyingi oʻyinini 22-noyabr kuni “Atletik Bilbao”ga qarshi oʻtkazadi.