Kecha, 30-noyabr kuni Ispaniya La Ligasining 14-tur oʻyinlari boʻlib oʻtdi. Kun doirasidan oʻrin olgan bahsda “Real Madrid” jamoasi Jirona shahrida shu nom bilan ataluvchi klub bilan kuch sinashdi.

Uchrashuvda hisob 45-daqiqada mezbonlar tomonidan ochildi. Azzedin Ounahi oʻz nomini tabloga yozdirib qoʻydi. Birinchi boʻlim 1:0 hisobi bilan yakunlandi.

Ikkinchi boʻlimning 67-daqiqasida “qaymoqranglilar” muvozanatni tikladi. Jamoa yetakchisi Kilian Mbappe penaltidan aniq foydalandi va hisobni 1:1 koʻrinishiga keltirdi.

Oʻyinda hisob boshqa oʻzgarmadi va jamoalar 1 ochkodan boʻlishib oldilar. Qatorasiga 3 ta oʻyinda durrang oʻynagan “Real Madrid” turnir jadvalida 2-oʻringa tushib ketdi.

“Jirona” — “Real Madrid” 1:1

Gollar: Ounahi (45) — Mbappe (67, penalti).

“Jirona” — Gassaniga, Rinkon (Franses, 72), Vanat (Kouruma, 83), Reys, Vitsel, Martines, Moreno, Ounahi (Ruis, 83), Xil (Roka, 72), Sigankov (Asprilla, 72).

“Real Madrid” — Kurtua, Trent (Gonsalo Garsiya, 90), Ryudiger, Militao, Fran Garsiya (Karreras, 90), Chuameni (Rodrigo, 72), Bellingem, Gyuler (Kamavinga, 46), Valverde, Mbappe, Vinisius.