Joriy yil 3 — 5-iyun kunlari Moʻynoq tumanida Qoraqalpogʻiston Respublikasi Joʻqorgʻi Kengesi va Vazirlar Kengashi, Oʻzbekiston Respublikasi Bosh prokuraturasi tomonidan Oʻzbekiston mudofaasiga koʻmaklashuvchi “Vatanparvar” tashkiloti bilan hamkorlikda tashkillashtirilayotgan “Rally Muynak – 2022” avtomotosport musobaqalari boʻlib oʻtmoqda.

Turnirni tashkil qilishdan asosiy maqsad - mintaqada turizmni rivojlantirish va sayyohlar oqimini koʻpaytirish, sport va festivallar turizmini rivojlantirish, mamlakatimizda avtomotosport turlarini ommalashtirishga, shuningdek, yosh avlodni texnik va amaliy sport turlariga jalb qilish boʻyicha kompaniyaga aylantirishdan iborat.

Bundan tashqari, rallini tashkillashtirish orqali tumanda turizm sohasida faoliyat olib boruvchi korxonalarni va xizmat koʻrsatish sohasini qoʻllab-quvvatlash maqsadi ham koʻzlangan.

Mazkur musobaqalarda Toshkent shahar, barcha viloyatlar va Qoraqalpogʻiston Respublikasining shahar (tuman)laridan kelgan 132 ta avtomotosport ustalari 5 ta yoʻnalishlarda kuch sinashmoqda.

3 – 4-iyun kunlari “A-8” va “A-9” avtomobil klasslari boʻyicha musobaqalarda sportchilar Moʻynoq shahri - Orol dengizining hozirgi qirgʻogʻigacha 415 km masofani bosib oʻtadi, mototsikl va baggi yoʻnalishidagi musobaqalar Moʻynoq shahrining oʻzida kross koʻrinishida tashkil qilinadi.

Joriy yilning 5-iyun kuni musobaqa gʻoliblarini taqdirlash marosimi boʻlib oʻtadi.