Qoʻrgʻontepa tumanidagi savdo doʻkoni omborxonasida qoʻlbola alkogol mahsulotlarini tayyorlash sexini tashkil etgan shaxslar qoʻlga olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Departamentning Qoʻrgʻontepa tumani boʻlimi tomonidan oʻtkazilgan tezkor tadbirda fuqaro O.A. “D.O.” MCHJni norasmiy boshqarib kelib, MCHJ savdo doʻkoni omborxonasida qoʻlbola alkogol mahsulotlarini tayyorlash sexini tashkil etganligi fosh qilindi.

Doʻkon va omborxonadan 100 dona yelim idishga quyilgan jami 1 000 litr qoʻlbola aroq va boshqa ishlab chiqarishda foydalanilgan tovar moddiy boyliklari ashyoviy dalil sifatida olingan.

Mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda muomalaga kiritish yoki ishlab chiqarish) bilan jinoyat ishi qoʻzgʻatilib, tergov harakatlari oʻtkazilmoqda.