Ikkinchi jahon urushi butun insoniyatga qaygʻu va musibatlar keltirishi bilan qalblarda ogʻir va oʻchmas iz qoldirdi. Millionlab insonlarning yostigʻini quritgan oʻsha dahshatli urushda yurtdoshlarimiz ham tinchlik va yorqin kelajak uchun mardonavor kurash olib bordi, jang maydonlarida mardlarcha qurbon boʻldi. Ularning qahramonligi doim yodimizda, mangu va abadiy yashaydi.

Qoraqalpogʻiston Respublikasi mudofaa ishlari boshqarmasida harbiy xizmatga kelayotgan navqiron yigitlarni vatanparvarlik ruhida tarbiyalash, ularga urushda ota-bobolarimiz koʻrsatgan jasorat va qahramonliklarini yetkazish maqsadida hamda fashizm ustidan qozonilgan gʻalabaning 75 yilligiga bagʻishlab Ikkinchi jahon urushi yillarining muzeyi tashkil etildi. Bu haqda Shimoli-gʻarbiy harbiy okrug matbuot xizmati tomonidan xabar berilmoqda.

Darvoqe, armiya ostonasi – mudofaa ishlari boʻlim va boshqarmalaridan boshlanishi, ayni haqiqat. Oʻsib kelayotgan yigit konstitutsiyaviy burchini ado etish uchun armiya bilan tanishishni aynan shu dargohdan boshlaydi. Demak uning harbiy vatanparvarlik tarbiyasi ham shu joyda yana-da yuksaladi.

Mudofaa ishlari boshqarmasining tashabbusi bilan qoraqalpogʻistonlik Ikkinchi jahon urushi qatnashchilarining oila aʼzolari oʻrtasida olib borilgan targʻibot va tashviqot ishlari natijasida qisqa vaqt ichida ushbu muzeyni yaratishga erishildi.

Shu bilan birga 400 ga yaqin eksponat, hujjat va qoʻlyozmalar Prezidentimiz tashabbusi bilan Toshkentda barpo etilayotgan “Gʻalaba bogʻi”dagi Shon-sharaf muzeyi fondi uchun taqdim etildi.

Eslatib oʻtamiz, Shon-sharaf muzeyi 9-may – Xotira va qadrlash kuni arafasida ochilishi rejalashtirilmoqda.

Qoraqalpogʻiston Respublikasi mudofaa ishlari boʻlimida ikki xonadan joy olgan urush yillaridagi muzey fondida qoraqalpoq xalqining fashizm ustidan gʻalaba qozonishga qoʻshgan hissasi, aholining front ortidagi xizmati haqida batafsil maʼlumotlar va dalillar keltirilgan. Tarix koʻzgusi boʻlmish ushbu muzeyda 100 ga yaqin eksponatlar, 200 ga yaqin tarixiy hujjatlar joy olgan. Ayni vaqtda mudofaa ishlari boshqarmasi bu eksponatlar bilan cheklanmasdan, muzey fondini yana-da boyitishni maqsad qilmoqda.

Taʼkidlash joizki, Ikkinchi jahon urushi yillarida Qoraqalpogʻistondan 50 mingdan ortiq insonlar frontga ketgan. Ulardan 34 mingdan ziyodi jang maydonida halok boʻldi va bedarak yoʻqoldi. 20 mingdan ziyod fuqarolar front ortida turli mamlakatlarda sanoat, kon-metallurgiya shaxtalarida hamda mamlakatimizning sanoat muassasalarida xizmat qilgan. Albatta, Qoraqalpogʻiston xalqining bu mehnatini, gʻalabaga qoʻshgan hissasini hech kim unutmaydi va uning abadiyligini taʼminlash uchun kuch va gʻayrat safarbar etiladi.