Botir MADIYOROV/“Xalq soʻzi”. 2024-yilning oʻtgan davrida Qoʻqon shahrining ikkita mahallasida zamonaviy sport inshootlari qurib, foydalanishga topshirildi. “Muqimiy” mahalla fuqarolar yigʻinida davlat-xususiy sheriklik asosida “Universal” sport maydoni, “Shaldiramoq” MFYda “Tashabbusli sport” dasturi boʻyicha Strit-Vorkaut maydonchasi faoliyat boshladi.

Aytish joiz, bugungi kunda Qoʻqon shahridagi 2 ta ixtisoslashgan sport maktabida 110 ta sport guruhi mashgʻulotlari yoʻlga qoʻyilgan boʻlib, ularda 3 ming nafarga yaqin mahalla yoshlari shugʻullanmoqda. Bu yigit-qizlarga 82 nafar malakali murabbiylar biriktirilgan.

Qoʻqon shahar hokimligi hamda Mahallalar uyushmasi Qoʻqon shahar boʻlimi hamkorligida mahallalarda muntazam ravishda oʻtkazilayotgan sport-sogʻlomlashtirish tadbirlarida minglab aholi vakillari faol ishtirok etmoqda.

— Mahallamizda futbol, voleybol, basketbol, yengil atletika sport turlari bilan shugʻullanish uchun zamonaviy sharoitlar yaratilgan, —deydi Qoʻqon shahridagi “Amir Temur” MFY yoshlar yetakchisi Barno Sultonova. — Shu bois mahallamizda tez-tez shahar miqyosida turli sport musobaqalari tashkil etiladi. Bu galgi turnirda ham shaharning deyarli barcha mahallalaridan yigit-qizlar jalb etildi.

Sport musobaqalari doʻstona ruhda oʻtkazilib, gʻoliblar tashkilotchilar tomonidan munosib ragʻbatlantirildi.