Oliy Majlis Qonunchilik palatasining majlisida “Toʻlovga qobiliyatsizlik toʻgʻrisida”gi Oʻzbekiston Respublikasi Qonuni qabul qilinganligi munosabati bilan Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish haqida»gi qonun loyihasi ikkinchi oʻqishda moddama-modda koʻrib chiqildi va qabul qilindi.

Mazkur qonun loyihasi bilan 7 ta kodeks, 18 ta qonunga oʻzgartirish va qoʻshimchalar kiritish taklif etilmoqda. Yaʼni “Toʻlovga qobiliyatsizlik toʻgʻrisida”gi Qonunda belgilangan soliq solishning oʻziga xos xususiyatlaridan kelib chiqib, Soliq kodeksiga toʻlovga qobiliyatsizlikning sogʻlomlashtirish jarayonida joriy soliq toʻlovlarini toʻlashni toʻxtatib turish va mazkur tartib-taomil yakunlangach soliq qarzlarini olti oy ichida teng miqdorda boʻlib-boʻlib toʻlash, qarzdor yuridik va jismoniy shaxslar yoki yakka tartibdagi tadbirkorning mol-mulkini sotishdan tushgan mablagʻlarning qarzdorlikni toʻlashga yoʻnaltirilgan qismini daromad sifatida hisobga olmaslikni nazarda tutish belgilanmoqda.

Majlisda “Turkiy investitsiya jamgʻarmasini taʼsis etish toʻgʻrisidagi Bitimni (Anqara, 2023-yil 16-mart) ratifikatsiya qilish haqida”gi qonun loyihasi qonun loyihasi moddama-modda koʻrib chiqildi va qabul qilindi.