Foto: Getty images

Oʻzbekiston vaqti bilan bugun, 2-iyun tongida AQSHning Nyu-Jersi shtatida UFC 302 musobaqasi boʻlib oʻtdi.

Kechaning markaziy jangi P4P reytingi yetakchisi Islom Maxachev va daʼvogar Dastin Porye oʻrtasida kechdi. Besh raundga moʻljallangan jang soʻnggi raundda bazasi kurash boʻlgan Islomning Poryeni boʻgʻib qoʻyishi bilan tugadi.

Porye 4 raund urinib koʻrdi, rossiyalik raqibining maksimal xavf tugʻdira oladigan kurashidan ikki-uch bor qutilib qoldi. U hatto 3-raundda Islomning peshonasini yorishga ham ulgurdi. 35 yoshli sportchi qonli kechgan jang davomida chempionlikka munosib jangchi ekanini isbotladi. Biroq Maxachev raqibining xatosini izladi va topdi, u 5-raund yakunida Poryeni boʻgʻish usuli bilan taslim qildi.

Jang yakunida amerikalik sportchi ajoyib jang uchun Islomga minnatdorchilik bildirdi va oʻzida shuncha titul janglaridan keyin motivatsiya tugaganini aytib, faoliyatini tugatishga shaʼma qildi.

Maʼlumot uchun, Poryening hisobida 30 ta gʻalaba va 8 ta magʻlubiyatli jang bor. 32 yoshli Maxachev esa bunga qadar 26 ta jangda qatnashib, 25 gʻalaba va 1 ta magʻlubiyat qayd etgan.