Qashqadaryo viloyati Koson tumanidagi xususiy bogʻchada 2,5 yoshli qizaloq vafot etdi. Bosh prokuratura matbuot kotibi Hayot Shamsutdinovning maʼlum qilishicha, hozirda mazkur holat yuzasidan tergovga qadar tekshiruv harakatlari olib borilmoqda.

“Kun.uz”ning yozishicha, hodisa joriy yilning 20-iyun kuni Koson tumani Ushoqtepa mahallasidagi L.H.ga tegishli xususiy bogʻchada sodir boʻlgan. Oʻsha kuni xususiy bogʻcha rahbari odatdagidek, oʻzining “Spark” rusumli mashinasida 2,5 yoshli Z.I.ni bogʻchaga olib ketgan. Oradan koʻp oʻtmay uning yaqinlariga qizaloqning tobi boʻlmay qolgani haqida xabar berilgan.

Qizaloqning oila aʼzolari poliklinikaga borganida shifokorlar bola hayot alomatlarisiz olib kelinganini aytib, u ekspertizaga olib ketilganini aytgan.

Ushoqtepa mahallasi raisining soʻzlariga koʻra, qizaloqning vafotidan soʻng xususiy bogʻcha faoliyati toʻxtatilgan.

Hayot Shamsutdinov qizning oʻlim sababini aniqlash maqsadida sud-tibbiy ekspertizasi tayinlangani, tekshirish harakatlari har tomonlama, toʻliq va xolisona oʻtkazilishi va natijasi boʻyicha qonuniy qaror qabul qilinishi taʼminlanishini maʼlum qildi.

“Marhumaning yaqinlariga chuqur taʼziya izhor etib, hamdardlik bildiramiz”, deb yozadi BP matbuot kotibi.