Illyustrativ foto

Qashqadaryoda 134 nafar talaba xotin-qizlarga OTM shartnoma pullari toʻlab berilmoqda. Bu haqda viloyat hokimligi matbuot xizmati xabar berdi.

Maʼlum qilinishicha, Yangi yil bayrami oldidan ijtimoiy himoyaga muhtoj, ehtiyojmand oila farzandlari, yetim yoki ota-onasining qaramogʻidan mahrum boʻlgan talaba xotin-qizlarning oliy taʼlim olishini qoʻllab-quvvatlash maqsadida Qashqadaryo viloyat hokimi Murotjon Azimov tomonidan muhim qaror qabul qilingan.

Ushbu qarorga koʻra, vohadagi 134 nafar talabaning oliy oʻquv yurtlarida oʻqishi uchun toʻlov shartnomalari bilan bogʻliq xarajatlariga qariyb 1 mlrd 128 mln soʻm mablagʻ ajratilgan.

“Bu ragʻbat xotin-qizlar uchun katta imkoniyatlar yaratadi. Koʻplab talaba qizlar moliyaviy qiyinchiliklar sababli oliy taʼlim olish imkoniyatidan mahrum boʻlishi mumkin edi, lekin viloyat hokimining bu tashabbusi ularning kelajakda yuqori malakali mutaxassis boʻlishlari uchun yoʻl ochadi”, deyiladi hokimlik xabarida.

Hujjatga koʻra, viloyat boʻyicha 134 nafar, xususan 18 nafar 1-kurs, 116 nafar yuqori kurs talabalarining toʻlov-kontrakt pullari toʻlab berilgan.