“Xalq soʻzi” gazetasi yosh ijodkorlarni qoʻllab-quvvatlash maqsadida tahririyat rasmiy veb-sayti Madaniyat rukni ostida «Yosh ijodkorlar gurngi»ni tashkil etdi.

Unda yosh shoir, nosir va tarjimonlarning ijodiy ishlari eʼlon qilib boriladi. Marhamat, oʻqing, bahra oling.

Bugun 1-iyun — Bolalarni himoya qilish xalqaro kuni munosabati bilan bolalar shoirasi boʻlib yetishib kelayotgan andijonlik umidli yosh ijodkor Mohidil Abdullayevaning ijod namunalarini eʼtiboringizga havola etamiz.

Mohidil Abdullayeva – 1998-yil Andijon viloyatida tugʻilgan. Alisher Navoiy nomidagi Toshkent davlat oʻzbek tili va adabiyoti universiteti bitiruvchisi. Bolalar uchun “Raqqos yaproqlar” nomli sheʼriy toʻplami nashr etilgan. Zomin respublika yosh ijodkorlar seminari ishtirokchisi.

 

MAKTABGA BORAMAN

Sen maktabga borasan:

Boʻying baland boʻlganda,

Yetti yoshga toʻlganda

Uqtirar Quyon xola.

Oʻylanib Quyon bola,

Keyin chizgʻich yoniga

Asta keldiyu yurib,

Oyoq uchida turib,

Qulogʻini koʻtardi

Va suyunchi kutardi.

Toʻnka ustiga chiqib,

Oʻhhoʻ, dedi Ayiqvoy:

Oʻsibsanmi, Quyontoy?

Tipratikan havasda,

Quyoncha der tinmasdan:

– Men maktabga boraman!

 

AʼLOCHI

Iroda koʻp odobli,

Bilimli ham orasta.

Har doim “besh” oladi,

Barcha unga havasda.

Hamma ishi maʼnoli,

Shu, bittasi bemaza:

Yoqmaydi vazifani

Koʻchirishga bermasa.

 

BESHNING AYTGANI

Kaminayu kamtarin

Toʻrt sonining akasi.

Tanidingiz men oʻsha --

Oltivoyning ukasi.

Raqamlar saltanatin

Gʻir aylanib kezay man.

Aʼlochi bolalarning

Kundaligin bezayman.

Oʻylab koʻrchi, nimaga

Anvar doim baxtiyor?

Chunki u yaxshi oʻqir

Va daftarda “besh”i bor.

 

TANAFFUS

Matematika zoʻrda, —

Dedi kulib Robiya.

— Eh bilmasvoy, eng zoʻri

Bu jismoniy tarbiya.

— Oʻqish eng yaxshi fan-ku,

Nega hyech kim bilmaydi?

— Menga tabiat yoqar,—

Deb Tursunboy jilmaydi.

— Endi oʻzim aytaman,

Bunaqasi ketmaydi,

Bu fanlarning hyech biri

Tanaffusga yetmaydi.

 

“IKKI”CHI

Bugun men “ikki” olib,

Boʻlib qoldim “ikki”chi.

Omonni “ikki”chi deb,

Bermagandim chizgʻichim.

Kundalikni oyimga

Hyech koʻrsatgim kelmaydi.

Endi Omon ham menga

Chizgʻichini bermaydi.

 

NYUTON

Bogʻimizga koʻrk berib

Turibdi koʻm-koʻk gʻoʻra.

Yedik biz mazza qilib

Bahorning oʻzi zoʻrda!

Pastki shohlar ayrildi,

Pishmagan oʻriklardan.

Juda berilib ketib,

Tosh oʻtdik shoʻrliklarga.

Ado boʻldi mevalar

Toʻlmay asl yoshiga.

Bitta tosh qaytib tushdi.

Otabekning boshiga.

Oyim aytdi, Nyuton

Boshiga tushib olma.

Bir qonunni kashf etib,

Zoʻr olim boʻlib qolgan.

Endi mening akam ham

Olim boʻladi, aniq.

Ukam, anov toshni ol,

Tomga chiqqinchi, qani.

Oʻzim pastda turaman,

Toshni tashla boshimga.

Men ham olim boʻlaman,

Toʻlmasdan oʻn yoshimga.

Deb, hazil qilsam, ukam,

Kular koʻzda yosh bilan.

Qanday olim boʻlasan,

Ishlamagan bosh bilan?!