Prezidentga moliyaviy nazorat rejalari boʻyicha axborot berildi

Prezident Shavkat Mirziyoyev joriy yil 20-yanvar kuni Hisob palatasi tomonidan 2024-yilda amalga oshirilgan ishlar va 2025-yilgi asosiy vazifalarga oid taqdimot bilan tanishdi.
Mablagʻlarning maqsadli ishlatilishi va dasturlar samaradorligida moliyaviy nazorat muhim. Soʻnggi yillarda Hisob palatasining ish uslubi oʻzgartirilib, hududlarda byudjet intizomiga koʻmak beruvchi hamkor idoraga aylantirildi. Oldingi tekshiruv tizimi oʻrniga xalqaro standartlar asosida audit tizimi joriy qilindi. Jahon bankining “Tashqi audit indikatori”da Oʻzbekiston “yaxshi” darajaga koʻtarildi.
2024-yil 10-iyulda Oʻzbekiston Prezidentining “Byudjet mablagʻlaridan foydalanish ustidan moliyaviy nazoratni kuchaytirish boʻyicha qoʻshimcha chora-tadbirlar toʻgʻrisida”gi farmoni qabul qilindi. Unda vazirlik va davlat idoralarida ichki audit tizimini takomillashtirish, tizimni raqamlashtirish, konsolidatsiyalashgan byudjet ijrosini tashqi auditdan oʻtkazish kabi vazifalar belgilandi.
Raqamli transformatsiya jarayoni amalga oshirilmoqda. “Masofaviy audit” avtomatlashtirilgan axborot tizimi joriy qilinib, unga 34 ta vazirlik va idora bogʻlandi.
2024-yilda Hisob palatasi yangi manbalar hisobidan 3,7 trillion soʻm byudjetga qoʻshimcha tushumlarni taʼminladi. Vazirlik va idoralarning 9,2 trillion soʻmlik samarasiz xarajatlari maqbullashtirildi, 2,3 trillion soʻmlik moliyaviy kamchiliklar oldi olindi. Davlat xaridlariga oid 4,5 trillion soʻmlik kamchiliklar bartaraf etildi.
Bunday amalga oshirilayotgan tizimli ishlarni joriy yilda ham izchil davom ettirish zarur.
Jumladan, “Masofaviy audit” avtomatlashtirilgan axborot tizimiga 110 ta vazirlik va idoraning maʼlumotlar bazasi integratsiya qilinadi. Bu orqali joriy yilda 480 trillion soʻmlik byudjet xarajatlari monitoringi toʻliq qamrab olinadi.
Byudjetga qoʻshimcha daromad manbalarini aniqlash, moliyaviy va boshqa xavflarning oldini olish doimiy vazifa hisoblanadi. Davlat ulushi bor korxonalarning moliyaviy faoliyatini doimiy monitoring qilib borish ham muhim.
Joriy yilda byudjetga 309 trillion soʻm daromadlar tushishini taʼminlash choralari koʻriladi. Xalqaro moliya institutlari mablagʻlari hisobidan amalga oshirilayotgan loyihalarni xalqaro standartlar asosida auditdan oʻtkazish amaliyoti boshlanadi.
Prezident barcha davlat idoralarida moliyaviy intizom va tejamkorlikka qatʼiy amal qilinishi zarurligini taʼkidladi.
Tavsiya etamiz
Ko‘p o‘qilganlar
- Oʻzbekistonda doimiy aholi soni har kuni necha kishiga oshyapti?
- Shahram Gʻiyosov tajribali raqibini muddatdan oldin magʻlub etdi
- Samarqand yana bir nufuzli forumga mezbonlik qiladi
- Yana bir bozor auksionga qoʻyildi
- Markaziy bank shoshilinch ogohlantirish bilan chiqdi
- “Leapmotor” Oʻzbekistonda oʻtkazilgan avtomobil testi natijalaridan noroziligini bildirdi
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring