Oʻzbekiston Respublikasi Prezidenti Shavkat Mirziyoyev 6-noyabr kuni Vashington shahriga amaliy tashrifining ishbilarmonlik dasturi doirasida AQSH Eksport-import banki rahbari Jon Yovanovichni qabul qildi.

Eksimbank hukumatning rasmiy eksport-kredit agentligi boʻlib, AQSH kompaniyalarining tashqi iqtisodiy faoliyatini qoʻllab-quvvatlaydi hamda ularga sugʻurta, kafolat va kredit vositalarini taqdim etadi.

Ushbu nufuzli institut bilan tayyorlangan qoʻshma dastur asosida energetika, muhim minerallar, transport, qishloq xoʻjaligi, AT va boshqa ustuvor yoʻnalishlardagi yirik loyihalarni moliyalashtirish boʻyicha hamkorlikni kengaytirish istiqbollari koʻrib chiqildi.

Eksimbankning mamlakatimiz aviaparkini modernizatsiya qilish va “Boeing” samolyotlarini yetkazib berishdagi ishtirokiga alohida eʼtibor qaratildi. Amaliy hamkorlikni davom ettirish va Uzoq muddatli sheriklik rejasini ishlab chiqishga kelishib olindi.

Uchrashuv yakunida davlatimiz rahbari huzurida Oʻzbekiston Respublikasi Investitsiyalar, sanoat va savdo vazirligi hamda AQSH Eksimbanki oʻrtasida imzolangan Qoʻshma loyihalarni moliyalashtirish toʻgʻrisidagi bitim almashildi.