Rossiya Federatsiyasi Chelyabinsk viloyatining Plast shahri sanʼat ixlosmandlari Oʻzbekiston davlat filarmoniyasi Buxoro viloyat boʻlinmasining “Buxorcha” ashula va raqs ansambli tomonidan ijro etilgan konsertni olqishlar bilan qarshi oldi. Yurtdoshlarimiz mazkur manzilda xalqaro milliy madaniyatlar XV “Sinegorye” festivali doirasida musiqiy dastur namoyish qildi.

— Ansamblimiz shu kunga qadar Yevropa va Osiyoning qator davlatlarida boʻlib, xalqimizning qadriyatlarini, anʼanalarini tarannum etuvchi loyihalarni amalga oshirdi, — deya xabar berdi filarmoniyaning viloyat filiali direktori Rauf Avezov. — Birgina “Ishq taronasi” deya nomlangan teatrlashtirilgan tomoshamiz minglab sanʼat muxlislari qalbidan joy olgan, desak, mubolagʻa qilmagan boʻlamiz. XV “Sinegorye” festivaliga kelsak, undagi musiqiy chiqishlarimiz bu yerda istiqomat qiluvchi rus, tatar, boshqird va boshqa millat vakillarida juda katta qiziqish uygʻotdi. Plast shahri sanʼatsevarlari biz bilan muloqot chogʻida Oʻzbekiston, Buxoro haqida maʼlumotlar olib, yurtimizga sayyoh sifatida kelish istagini bildirishdi.

Darvoqe, Plast salkam ikki yuz yillik tarixga ega shahar sanaladi. U oltintoparlar manzili sifatida tanilgan. Ushbu goʻsha maftunkor tabiati hamda qator diqqatga sazovor joylari bilan ajralib turadi.

Istam IBROHIMOV

“Xalq soʻzi”.