Foto: “Dunyo”

Oʻzbekistonning Monako Knyazligidagi birinchi Favqulodda va Muxtor elchisi Nodir Gʻaniyev Knyaz Albert II ga ishonch yorliqlarini topshirdi. Bu haqda “Dunyo” axborot agentligi xabar berdi.

Maʼlum qilinishicha, joriy yilning 7-oktyabr kuni boʻlib oʻtgan tantanali marosimdan soʻng tashkil etilgan muloqot chogʻida Albert II Oʻzbekistonda Prezident Shavkat Mirziyoyev rahnamoligida amalga oshirilayotgan islohotlarning borishini yuqori baholagan.

Ekologiya va atrof-muhitni muhofaza qilishga sodiqligi bilan tanilgan Monako Knyazi Oʻzbekistonda qayta tiklanadigan energetika boʻyicha yirik loyihalarni rivojlantirishdan manfaatdor ekanini bildirib, yashil iqtisodiyotga oʻtish borasidagi saʼy-harakatlarni va 2030-yilgacha qayta tiklanadigan energiya manbalaridan elektr energiyasining 54 foizini ishlab chiqarish kabi ulkan maqsadni eʼtirof etgan.

Monako Knyazi, shuningdek, Oʻzbekistonni joriy yilning oktyabr — noyabr oylarida Samarqand shahri YUNESKO Bosh konferensiyasining 43-sessiyasiga mezbonlik qilishi bilan samimiy tabriklagan. U mazkur nufuzli tadbir Oʻzbekistonning xalqaro hamjamiyatga ochiqligi, tashqi siyosiy faoliyatining yorqin ifodasi ekanini alohida taʼkidlagan.

Oʻzbekiston elchisi, oʻz navbatida, Oʻzbekiston-Monako munosabatlarini yanada rivojlantirish uchun barcha saʼy-harakatlarini amalga oshirishini bildirgan.

Maʼlumot uchun, Oʻzbekiston va Monako oʻrtasidagi diplomatik munosabatlar 2013-yil 29-noyabrda oʻrnatilgan.

Nodir Gʻaniyev Oʻzbekistonning Fransiyadagi elchisi etib tayinlangan va 2024-yil sentyabr oyida Prezident Emmanuel Makronga ishonch yorliqlarini topshirgan edi. Diplomat shu yilning may oyidan buyon mamlakatimizning Portugaliyadagi elchisi lavozimida ham ishlab kelmoqda.