Ijtimoiy tarmoqlarda bir guruh oʻzbekistonliklar Dubay shahri koʻchalarida mushtlashgani va ish pichoqbozlikkacha borib yetgani haqida xabarlar tarqaldi. Oʻzbekiston Tashqi ishlar vazirining matbuot kotibi Ahror Burhonov mazkur holat vizasiz rejim bekor qilinishiga sabab boʻlishi mumkinligini maʼlum qildi.

Bildirilishicha, Dubay shahrida oʻzbekistonliklar oʻrtasida yuzaga kelgan holat boʻyicha aniqlik kiritish maqsadida Oʻzbekiston diplomatlari Dubay jinoyat qidiruv boshqarmasi rahbariyati bilan uchrashuv oʻtkazgan.

Uchrashuvda BAA tomoni mazkur holat boʻyicha tergov harakatlari olib borilayotganini, 15 nafar Oʻzbekiston fuqarosi qoʻlga olinganini maʼlum qilgan.

Shuningdek, soʻnggi vaqtlarda Oʻzbekiston fuqarolari tomonidan sodir etilayotgan qonunbuzarlik holatlari koʻpayayotgani ikki davlat oʻrtasidagi vizasiz tartibga taʼsir koʻrsatishi mumkinligi taʼkidlangan.

Burhonovning qoʻshimcha qilinishicha, Tashqi ishlar vazirligi mazkur holat yuzasidan tegishli huquqni muhofaza qiluvchi organlar bilan hamkorlikda ish olib bormoqda.

“Oʻzbekiston fuqarolarini xorijdagi yurtdoshlarimiz shaʼniga dogʻ tushiruvchi harakatlardan tiyilishga chaqiramiz”, deb yozadi TIV matbuot kotibi.