Rossiya Federatsiyasining Moskva viloyatida joylashgan «Maxima stables» ot sporti klubida konkur boʻyicha “Millatlar kubogi”ning navbatdagi bosqichi oʻz yakuniga yetdi. Quvonarlisi, yakunda terma jamoamiz vakillari umumjamoa hisobida peshqadamlikni qoʻlga olishdi. Bu haqda MOQ xabar berdi.

Yevrosiyo ot sporti assotsiatsiyasi tomonidan tashkil etilgan mazkur musobaqada chavandozlarimiz bir qator yoʻnalishlarda gʻalaba qozonishdi. Jumladan, yoshlar oʻrtasida oʻtkaziladigan CSI-CH dasturida Boburjon Valijonov eng yaxshi natijani qayd etib, oltin medal bilan taqdirlandi. Terma jamoalar miqyosida kechgan bellashuvlarda yigitlarimiz kumush medalga sazovor boʻlishdi.

Qayd etish joiz, chavandozlarimiz bu yilgi yirik musobaqalarda 9 ta oltin, 11 ta kumush va 5 ta bronza medallari jamgʻarishga muvaffaq boʻldilar. “Millatlar kubogi”ning ortda qolgan 3 bosqichi yakuniga koʻra jamoamiz eng katta ballni qoʻlga kiritib turibdi.

1. Oʻzbekiston – 260

2. Qirgʻiziston – 220

3. Rossiya – 170

“Millatlar kubogi”ning yakuniy bosqichi 4-8-avgust kunlari ushbu viloyatdagi «Ivanovskoye» ot sporti klubida boʻlib oʻtadi.