2024-yilning yanvar-oktyabr oylari davomida Oʻzbekistonga 57,7 ming nafar Xitoy fuqarolari turistik maqsadlarda tashrif buyurgan. Bu koʻrsatkich 2023-yilning shu davri bilan solishtirilganda 22,3 ming nafarga yoki 63,1 foizga oshganini koʻrsatadi. Turizm sohasidagi bu ijobiy oʻsish Oʻzbekistonning xalqaro miqyosdagi jozibadorligini yanada oshirmoqda.

Tashrif buyurgan xitoylik fuqarolarning aksariyati sayyohlik maqsadida kelgan boʻlib, ularning soni 50 ming 52 nafarni tashkil qildi. Xizmat safarlari uchun tashrif buyurganlar soni 4 ming 732 nafarga yetgan. Qarindoshlarni yoʻqlash maqsadida kelganlar esa 1 121 nafarni tashkil etyapti. Shuningdek, 1085 nafar xitoylik tijorat maqsadida, 708 nafar oʻqish va 2 nafar davolanish uchun tashrif buyurgan.

Turistlar sonining oshishi Oʻzbekistondagi sayyohlik salohiyatining yuqori ekanligidan dalolat beradi. Buni xorijlik mehmonlar uchun qulay sharoitlar, viza rasmiylashtirishdagi yengilliklar va madaniy-tarixiy merosga boʻlgan qiziqish bilan izohlash mumkin. Xitoylik sayyohlar uchun oʻzbek milliy anʼanalari, meʼmoriy obidalar va gastronomik taomlar asosiy qiziqish nuqtalari boʻlib qolmoqda.

Oʻzbekistonning Statistika agentligi maʼlumotlariga koʻra,Xitoydan tashrif buyuruvchilar sonining oshishi turizm sohasini yanada rivojlantirish uchun katta imkoniyat yaratadi. Bu holat kelgusida Xitoy bilan turizm sohasida hamkorlikni yanada mustahkamlashga asos boʻlishi mumkin. Shuningdek, bunday natijalar mamlakat iqtisodiyoti uchun ham ijobiy samara keltirishi kutilmoqda.