Illyustrativ foto

“Tommy Hilfiger” brendini soxtalashtirib ishlab chiqargan korxonaga chora koʻrilgan. Bu haqda Adliya vazirligi xabar qildi.

Qoʻshtirnoq ichidagi tadbirkorlar isteʼmolchilarni aldash, tezda boyib ketish maqsadida mashhur kompaniyalarning brendlaridan foydalangan holda mahsulotlar ishlab chiqaradi yoki ushbu mahsulotlarni har xil chegirmalar, aksiyalar va boshqacha koʻrinishlarda sotuvga chiqaradi.

Vazirlik tomonidan “Tommy Hilfiger Licensing B.V.” Niderlandiya kompaniyasining tovar belgisiga boʻlgan huquqlarini “P.B.” MCHJ buzayotganligi toʻgʻrisidagi murojaat koʻrib chiqildi.

Tekshiruvlar natijasida, “P.B.” MCHJ tomonidan “Tommy Hilfiger” tovar belgisiga oʻxshash boʻlgan belgilardan foydalangan holda ishlab chiqarilgan kontrafakt trikotaj mahsulotlar sotuvga taklif etilayotganligi aniqlandi.

Vazirlik tomonidan “P.B.” MCHJga nisbatan tegishli taʼsir chorasi qoʻllanildi hamda kontrafakt kiyim-kechak mahsulotlaridan “Tommy Hilfiger” tovar belgilarini olib tashlash, buning imkoni boʻlmagan taqdirda, tegishli tovarlarni yoʻq qilish majburiyati yuklandi.