Oʻzbekistonda ayrim turdagi yoʻl harakati qoidalarini takroriy ravishda buzgan haydovchilarga nisbatan jarima toʻlashdagi imtiyozlar bekor qilinishi taklif etildi. Ichki ishlar vazirligi bu haqdagi loyihani jamoatchilik muhokamasiga qoʻydi.

Maʼlumki, Maʼmuriy javobgarlik toʻgʻrisidagi kodeksning 332-1-moddasiga koʻra, agar haydovchi jazo qoʻllash toʻgʻrisidagi qaror berilgan kundan boshlab 15 kun ichida jarimaning 50 foizini yoki 30 kun ichida 70 foizini ixtiyoriy ravishda toʻlasa, qolgan qismi kechiriladi.

Loyihada esa ushbu tartib ayrim hollarda qoʻllanmasligi nazarda tutilmoqda. Yaʼni, muayyan qonunbuzarlikni bir oy ichida bir necha bor sodir etgan haydovchilar uchun chegirma amal qilmaydi.

Jumladan:

— transport vositasi haydovchisi yoʻl harakati tezligini belgilangan meʼyordan 40–60 km/soatdan ortiqqa oshirsa va bunday holat bir oyda 5-marta qayd etilsa;

— haydovchi svetoforning taqiqlovchi signali yoki yoʻl harakati nazoratchisi taqiqlovchi ishorasida toʻxtamasa va bu holat bir oyda 2-marta sodir etilsa;

— haydovchi qarshi yoʻnalish polosasiga chiqib ketsa yoki boshqa haydovchilarning xavfsizligiga tahdid solgan holatda harakat qilsa va bu holat bir oyda 2-marta kuzatilsa.

Shuningdek, hujjatda yoʻl harakati qoidalarini tizimli ravishda buzgan yoki tezlikni 100 km/soatdan koʻproqqa oshirgan haydovchilarni haydash huquqidan mahrum etish masalasi ham koʻtarilmoqda.