Oʻzbekiston hukumati “Jurabek Laboratories” kompaniyasida ishlab chiqarilgan ZF-UZ-VAC 2001 va “Sputnik V” vaksinalarini davlat roʻyxatidan oʻtkazishga rozilik berdi. Bu haqda Telegramʻdagi “Vaksinauz” kanali xabar berdi.

Qayd etilishicha, bosh vazir Abdulla Aripov 20-avgust kuni Vazirlar Mahkamasining “Oʻzbekiston Respublikasida koronavirus infeksiyasi bilan bogʻliq epidemiologik vaziyat barqarorligini taʼminlash boʻyicha qoʻshimchcha chora-tadbirlar toʻgʻrisida”gi qaroriga imzo chekkan.

Hujjatda “Jurabek Laboratories” kompaniyasi “Anhui Zhifei Longcom Biopharmaceutical” Xitoy kompaniyasi bilan ZF-UZ-VAC-2001 vaksinasini Oʻzbekistonda ishlab chiqarish boʻyicha kelishuvga erishgani qayd etilgan. Dastlabki bosqichda xitoylik hamkorlar vaksina substansiyasini yetkazib berish masalasini koʻrib chiqayotgani aytilgan.

Shuningdek, kompaniya Rossiya kompaniyasi bilan “Sputnik V” vaksinasini Oʻzbekistonda ishlab chiqarish boʻyicha kelishuvga ham erishgan. Uning ham dastlabki bosqichda substansiyasi Rossiya tomonidan yetkazib berilishi maʼlum qilingan.

Taʼkidlanishicha, istisno tariqasida ishlab chiqarish jarayonlariga doir teznik jihatdan tartibga solish sohasidagi normativ hujjatlar, vaksinalarni substansiyalari va “in bulk” ishlab chiqaruvchilarining klinik oldi va klinik tadqiqotlari ijobiy xulosalarini tan olinmoqda.

Shu bilan birga, Farmatsevtika tarmogʻini rivojlantirish agentligining “Dori vositalari, tibbiy buyumlar va tibbiy texnika ekspertizasi va standartlashtirish davlat markazi” DUKga kompaniya tomonidan ishlab chiqariladigan vaksinalarning laboratoriya sinovlari va roʻyxatdan oʻtkazish hujjatlari ekspertizasi besh ish kunida amalga oshirishni taʼminlash vazifasi yuklatilmoqda.