Gulchilik va koʻchatchilik sohalari rivojlantiriladi. Tegishli qarorni Shavkat Mirziyoyev imzoladi. Hujjatga koʻra:

➖ Gul yetishtiruvchilar uyushmasi tashkil etilmoqda. Uning faoliyatini tashkil etish, malakali mutaxassislarni jalb qilish hamda uning moddiy-texnika bazasini mustahkamlash uchun Bogʻdorchilik va issiqxona xoʻjaligini rivojlantirish jamgʻarmasi hisobidan 20 mlrd soʻm ajratilmoqda;

➖ Andijon viloyatining Andijon, Izboskan va Oltinkoʻl tumanlari, Namangan viloyatining Namangan va Davlatobod tumanlari, Jizzax viloyatining Zomin va Gʻallaorol tumanlari gulchilikka ixtisoslashtirilmoqda;

➖ Gulchilik sohasida oliy maʼlumotli kadrlarni tayyorlash maqsadida:

2022/2023 oʻquv yilidan boshlab qishloq xoʻjaligi yoʻnalishidagi OTMlarida Gulchilik magistratura mutaxassisligi boʻyicha kadrlar tayyorlash yoʻlga qoʻyiladi;

2021/2022 oʻquv yilidan boshlab Manzarali bogʻdorchilik va koʻkalamzorlashtirish bakalavriat taʼlim yoʻnalishining oʻquv rejasiga gulchilikka oid mutaxassislik fanlari kiritiladi va ularning oʻquv soatlari oshiriladi;

➖ gul eksporti bilan shugʻullanuvchi tadbirkorlik subyektlarining gul koʻchatlari, urugʻlari, piyozlari va payvandtaglari importi uchun sarflagan transport xarajatlarining 50 foizi Eksportni ragʻbatlantirish agentligi tomonidan qoplanadi;

➖ 2023-yil 1-yanvarga qadar respublika hududiga olib kirilayotgan tuganaklar, piyozboshlar, tuganaksimon ildizlar, tuganak piyozlar, ildizpoya hamda boshqa tirik oʻsimliklar (jumladan, ildizlari), qalamchalar va parxishiga nisbatan bojxona bojining “nol” stavkasi belgilanmoqda;

➖ gulchilik sohasida ilm-fanni qoʻllab-quvvatlash maqsadida Innovatsion rivojlanish vazirligi tomonidan grantlar ajratish tizimi joriy etiladi;

➖ Toshkent va Namangan shaharlarida yirik ulgurji gul bozori tashkil etiladi.