Illyustrativ foto

Oʻzbekistonda birinchi marta yozgi isteʼmol hajmi qishki isteʼmol hajmini ortda qoldirdi. Bu haqda Energetika vazirligi axborot xizmati xabar berdi.

Milliy dispetcherlik markazi maʼlumotlariga koʻra, 2025-yil 16-iyuldan 21-iyulgacha boʻlgan anomal issiq davrda Oʻzbekiston energetika tizimida sutkalik elektr energiyasi isteʼmoli va yuklamasi boʻyicha yangi tarixiy rekordlar qayd etilgan.

Xususan, birinchi marta elektr energiyasi isteʼmolida yozgi koʻrsatkichlar qishki maksimal koʻrsatkichlardan oshgani qayd etilgan. Jumladan, 2025-yil 18-iyul kunlik isteʼmol miqdori 272,6 mln kVt•soat, bu qishki maksimumdan (271,8 mln kVt•soat) va avvalgi yozgi rekorddan (253,3 mln kVt•soat) oshib ketgan.

Kecha, 21-iyul kuni soat 17:00 da energetika tizimining maksimal quvvati 13,3 GVtga yetgan, bu qishki rekorddan (12,5 GVt) va 2024-yil iyul oyidagi koʻrsatkichlardan (11,8 GVt) yuqori.

Eng katta oʻsish Toshkent shahrida qayd etilgan. Xususan:

• Sutkalik isteʼmol — 32,4 mln kVt•soat (2024-yilda kuzatilgan maksimal isteʼmol — 30,5 mln kVt•soat)ga yetib, 2024-yilning mos davriga nisbatan 33%ga koʻpni tashkil etdi.
• Eng yuqori yuklama soat 14:52 da — 1811 MVt (2024-yilda — 1680 MVt)ni tashkil qilgan;
• Joriy isteʼmol darajasi 2024-yil iyul oyining shu davriga nisbatan 7,6 foizga yuqori boʻlib, oy boshidan buyon oʻsish 11,0 foizni tashkil etgan.

Taʼkidlanishicha, isteʼmol yuqori paytlarda elektr tarmoqlarida uzilishlarning oldini olish va bartaraf etish maqsadida “Hududiy elektr tarmoqlari” AJ va uning filiallarida tunu kun ishlaydigan avariyaga qarshi maxsus brigadalar tashkil etilgan. Ular yuzaga kelgan nosozliklarni zudlik bilan bartaraf etib borishmoqda.

“Ayrim joylardagi elektr taʼminotida kuzatilayotgan uzilishlar tufayli isteʼmolchilardan uzr soʻraymiz”, deyiladi vazirlik xabarida.

Shuningdek, isteʼmolchilardan elektr energiyasidan imkon qadar tejamkorlik bilan foydalanishlari soʻralgan. Zarurat boʻlmagan hollarda elektr jihozlaridan foydalanmaslik tizimda yuklamaning ortishi, nosozlik va uzilishlar sodir boʻlishini oldini olishga katta hissa qoʻshishi qayd etilgan.