23-iyun kuni Oʻzbekistonning 16 shahrida Xalqaro Olimpiya kuni, Bolalarni himoya qilish kuni va Yoshlar kuniga bagʻishlangan «BYD Yangi Nafas» anʼanaviy ommaviy yugurish musobaqasi boʻlib oʻtadi. Shuningdek, Toshkentda oliy harbiy oʻquv muassasalari bitiruvchilari ishtirokida ham «Vatan qalqoni» harbiy-vatanparvarlik ommaviy yugurish musobaqasi ham oʻtkaziladi.

«BYD Yangi nafas» va «Vatan qalqoni» ommaviy yugurish musobaqalarida maktab oʻquvchilari, talabalar, sayyohlar, tadbirkorlik va davlat tuzilmalari vakillari, harbiy xizmatchilar, jamoat arboblaridan iborat 60 mingga yaqin kishi ishtirok etishi rejalashtirilmoqda.

Anʼanaviy ommaviy yugurish musobaqasi masofasi 3 kilometr boʻlib, Andijon, Namangan, Fargʻona, Nurafshon, Navoiy, Guliston, Jizzax, Samarqand, Termiz, Qarshi, Buxoro, Qorovulbozor, Gʻuzor, Urganch va Nukus shaharlarining markaziy koʻchalari boʻylab oʻtadi.

Toshkentda poyga starti «Yangi Oʻzbekiston» bogʻida beriladi. Barcha ommaviy yugurish musobaqalari bir vaqtning oʻzida ertalab soat 07:00 da boshlanadi. Hozircha tashkilotchilar sovrinlarni eʼlon qilmagan.

Qayd etish lozimki, tadbir «Oʻzbekneftgaz» AJ va Oʻzbekiston Yengil atletika federatsiyasi tashkiliy koʻmagida oʻtkazilmoqda.