Foto: “Xalq soʻzi”

Samarqanddagi “Boqiy shahar” majmuasida joylashgan “Samarkand Regency Amir Temur” mehmonxonasi konferens zalida “Notariat faoliyatini takomillashtirish va rivojlantirish istiqbollari” mavzusidagi Xalqaro konferensiya oʻtdi. 

Unda oʻz faoliyatini eng yaxshi xorijiy tajribalarni oʻrganish, notariat sohasiga joriy qilish, shu bilan birga Oʻzbekiston tajribasini dunyoga yoyish orqali Oʻzbekiston imijini yaxshilashga hissa qoʻshish maqsadida olib borayotgan Oʻzbekiston Notarial palatasi bugun Rossiya Federatsiyasi Federal Notarial palatasi  delegatsiyasi ishtirokida oʻtkazildi.

Konferensiya ishini Oʻzbekiston Notarial palatasi raisi D. Ashurov ochdi va mamlakatimiz notariat sohasiga joriy qilingan yangiliklar, palataning xorijiy hamkorlar bilan olib borayotgan muzokaralari hamda imzolangan memorandumlar doirasida amalga oshirilayotgan ishlar, shuningdek, Notarial palataning qisqa davr oraligʻida Xalqaro notariuslar ittifoqiga aʼzo boʻlgani haqida toʻxtalib oʻtdi.

Konferensiyada Rossiya Federatsiyasi Federal Notarial palatasining prezidenti Konstantin Korsik  bugungi kunning dolzarb mavzusi – notariatni raqamlashtirish mavzusida chiqish qildi. Bu borada Rossiya Federatsiyasida amalga oshirilgan ishlar bilan bir qatorda, Oʻzbekistonda notariat sohasida amalga oshirilgan oʻzgarishlar, tashkil etilganiga 2 yildan oshgan Notarial palataning erishgan muvaffaqiyatlarini eʼtirof etdi.

Shundan soʻng Rossiya Federal Notarial palatasi hamda Oʻzbekiston Notarial palatasi oʻrtasida hamkorlik memorandumi imzolandi. Har ikkala taraf ushbu hamkorlik doirasida samarali ishlar amalga oshirilishi, bir-birlaridan oʻrganishi lozim boʻlgan jihatlar mavjudligini eʼtirof etdilar. Bunday hamkorliklar doirasida sohani takomillashtirish orqali fuqarolarga huquqiy xizmat koʻrsatishning qulay va shaffof boʻlishiga erishish ekanligi taʼkidlandi.

- Biz atigi 3 yilga yaqin muddatda faoliyat yuritayotgan, shu bilan birgalikda 30 yillik tajribaga ega Rossiya Federatsiyasi xususiy notariuslarining faoliyatiga ham joriy qilsa boʻladigan yangiliklari bor Oʻzbekiston Notarial palatasi bilan hamkorlik memorandumi imzolaganimizdan xursandmiz, - dedi oʻz intervyusida Rossiya Federal Notarial palatasi prezidenti Konstantin Anatolevich Korsik. - Biz bir necha bor uchrashuvlar, onlayn va offlayn suhbatlar oʻtkazish orqali, bir-birimizdan oʻrganadigan jihatlar borligini, hamkorlik memorandumimiz orqali Rossiya hamda Oʻzbekiston fuqarolari uchun juda katta qulayliklar yaratishimiz mumkinligiga ishonch hosil qilganimizdan keyin, bu hamkorlik memorandumini imzoladik.

Xalqaro konferensiya doirasida yana bir muhim tadbir oʻtkazildi, yaʼni Moskva shahar Notarial palatasi hamda Oʻzbekiston Notarial palatasining Samarqand  viloyat boshqarmasi oʻrtasida hamkorlik kelishuvi imzolandi.

Shundan soʻng, xalqaro konferensiyada Moskva shahar notarial palatasi xalqaro hamkorlik komissiyasi aʼzosi Yuriy Kashurin “Masofaviy notariat” mavzusida maʼruza qildi. Unda masofaviy notariatning huquqiy asoslari, masofadan turib, notarial harakatlarni amalga oshirish tartibi, uning afzallik tomonlari toʻgʻrisida batafsil taqdimot qildi.

- Hozirgi globallashuv zamonida masofaviy notariat har qachongidan dolzarb, ushbu jarayonni amalga oshirish fuqarolarimiz uchun juda katta qulayliklarni yaratadi, - deydi Notarial palataning Toshkent shahar hududiy boshqarmasi boshligʻi Bahodir Zoirov.

Xalqaro konferensiya doirasida Federal palataning Boshqaruvi aʼzosi, Samara viloyati notarial palatasi prezidenti Galina Yurevna Nikolayeva “Notarius tomonidan taʼminlangan dalillar kuchi” mavzusida taqdimot qildi.

Dalillarni taʼminlash Rossiya notariuslari tomonidan amaliyotda qanday amalga oshirilayotganligi, bunda nimalarga eʼtibor berish kerakligi, dalillarni taʼminlash muddatlari, sharoitlari, tartibi haqida batafsil tushuncha berdi. Aytish joizki, dalillarni taʼminlash amaliyoti Oʻzbekistonda ham joriy etilgan boʻlib, bu borada ilk amaliyot oʻtgan yilning birinchi choragida amalga oshirilgan edi.

Konferensiyada, shuningdek,  Xalqaro hamkorlik boʻyicha Federal notarial palata komissiyasi aʼzosi, xalqaro aloqalar boʻyicha Moskva shahar notarial palatasi komissiyasi aʼzosi Yelena Obrazsovaning “Er-xotinning birgalikdagi orttirgan mulkini, shu jumladan, yuridik shaxslarning ulushlarini va mol-mulkini tasarruf etishning oʻziga xos xususiyatlari” mavzusidagi maʼruzasi tinglandi. Har ikkala tomon uchun juda dolzarb ahamiyatga ega boʻlgan ushbu maʼruzada Rossiya notariuslari amaliyotida er va xotinning umumiy mulki, shu jumladan, yuridik shaxslarda ularning ulushlari va mol mulki qanday tartibda tasarruf etilishi, qaysi holatlarda mulkni tasarruf etishda er-xotinning roziligi olinishi haqida maʼlumot berdi. Mavzu yuzasidan qizgʻin munozaralar boʻlib oʻtdi.

Konferensiya doirasida mehmonlar eʼtiboriga Oʻzbekiston Respublikasi Adliya vazirligi xodimi Umidjon Valiyev tomonidan “Notarius” avtomatlashtirilgan axborot tizimini taqdimot qilindi.

“Notarius” AAT xususiy amaliyot bilan shugʻullanuvchi notariuslar hamda fuqarolar  uchun juda katta qulaylik yaratgan. Ayniqsa, davlat organlari va tashkilotlarining elektron bazasi bilan integratsiya qilinganligi, fuqarolarning tashkilotlar oʻrtasida sarsongarchiliklarining oldini oladi. Misol uchun, Davlat yoʻl harakati xavfsizligi xizmati elektron bazasi bilan integratsiya fuqaroga tegishli avtomototransportning rusumi, raqami, unga qoʻyilgan taqiq va boshqa maʼlumotlarni tizim orqali koʻrish imkonini beradi.

Rossiyalik notariuslar “Notarius” avtomatlashtirilgan axborot tizimida notarial harakat uchun toʻlovlar qanday amalga oshirilishi bilan tanishdilar.