Foto: “Oʻzbekenergo” AJ Matbuot xizmati

“Oʻzbekenergo” AJda Rossiya Federatsiyasi energetika vazirligi departamenti boshligʻi Aleksey Kiryakov hamda “Inter RAOEES” kompaniyasi vakili Sergey Perevedensev bilan Jamiyat rahbariyati oʻrtasida uchrashuv boʻlib oʻtdi.

“Oʻzbekenergo” AJ Matbuot xizmati tomonidan maʼlum qilinishicha, uchrashuvda tomonlar oʻzaro hamkorlik aloqalarini yanada rivojlantirish, issiqlik elektr stansiyalarini modernizatsiya qilish, yangi elektr energiya ishlab chiqarish quvvatlarini hamkorlikda qurish masalalarini muhokama qilishgan.

“Oʻzbekenergo” AJ Boshqaruv raisi U. MustafoyevRossiya Federatsiyasi bilan Oʻzbekiston elektr energetika sohasida oʻzaro aloqalarni mustahkamlash,ikki tomon uchun ham manfaatli ekanligini taʼkidlab, bu borada qilinishi lozim boʻlgan masalalarga alohida eʼtibor qaratdi. Xususan, oʻzaro muloqotda “Toshkent IES”, “Navoiy IES”, “Taxiatosh IES” va “Angren IES” da jami 18 ta energobloklarni modernizatsiya va rekonstruksiya qilish hamda “Oʻzbekenergo” AJning “Angren IES” va “Yangi Angren IES”ga ishonchli va innovatsion boshqaruvga oʻtish uchun oʻzaro hamkorlik aloqalarini amalga oshirish borasidagi masalalar yuzasidan fikr almashildi.

Oʻz navbatida, Rossiya Federatsiyasi energetika vazirligi departamenti boshligʻi Aleksey Kiryakov Rossiya energetika vazirligi “Oʻzbekenergo” AJ bilan oʻzaro hamkorlik uchun barcha imkoniyatlarni ishga solishga tayyor ekanligini bildirdi.