Malayziya Milliy universiteti huzuridagi Islom sivilizatsiyasi institutining direktori, professor Fariza Sham “Dunyo” axborot agentligiga bergan intervyusida Oʻzbekiston rahbariyatining oʻzbek xalqining boy madaniy-tarixiy va maʼnaviy merosi, milliy va diniy qadriyatlari hamda islom dinining insonparvarlik ahamiyatini ochib berish yoʻlidagi saʼy-harakatlari yuzasidan oʻz fikr-mulohazalarini bildirdi.

— Men, avvalambor, Malayziya keng jamoatchiligi vakillari Oʻzbekistonda hayotga tatbiq etilayotgan keng koʻlamli islohotlar, vijdon va eʼtiqod erkinligining taʼminlash, bagʻrikenglik va insonparvarlik madaniyatini rivojlantirish sohalaridagi oʻzgarishlarni katta qiziqish bilan kuzatib borayotganini qayd etishni istardim, — dedi u. — Darhaqiqat, Oʻzbekiston rahbariyatining islom sivilizatsiyasi boy merosini har tomonlama oʻrganish hamda islom dinining tom maʼnodagi insonparvarlik mohiyatini keng yoyishga boʻlgan yondashuvi alohida eʼtiborga sazovordir.

Soʻnggi yillar mobaynida mamlakatda yirik ilmiy maskanlar oʻz faoliyatini boshladi. Ular orasida Islom sivilizatsiyasi markazi, Imom Buxoriy va Imom Termiziy xalqaro ilmiy-tadqiqot markazlari va boshqa muassasalar bor.

Joriy yil institutimiz Islom sivilizatsiyasi markazi bilan hamkorlik aloqalarini yoʻlga qoʻydi. Ushbu markaz islom sivilizatsiyasi oltin asrining madaniy, ilmiy va maʼnaviy-axloqiy mulki hamda qadriyatlarini oʻzida mujassam etgan ulugʻvor va noyob muassasalardan biri deb bilaman.

Yana shunisi ham eʼtiborga molikki, mazkur markazning yangi binosida Markaziy Osiyoda yashagan va ilmiy-ijodiy faoliyat yuritgan, jahon madaniyati va musulmon sivilizatsiyasi taraqqiyotiga bebaho hissa qoʻshgan buyuk alloma va mutafakkirlarning ulkan merosi jamlanadi. Dizayni va koʻp tarmoqliligi, unda boy ilmiy ishlar, qoʻlyozmalar va osori-atiqalar toʻplamlarining joy olishi yangi tadqiqot va yangi muvaffaqiyatlarni qoʻlga kiritish uchun yangi imkoniyatlar eshigini ochish hamda islom sivilizatsiyasining oltin davri muhitiga shoʻngʻishimiz uchun juda qulay imkoniyat yaratadi.