Oʻzbekiston Prezidenti Parlamentlararo ittifoq bilan samarali hamkorlikning muhim natijalarini qayd etdi

18:44 08 Sentyabr 2022 Siyosat
949 0

Foto: Oʻzbekiston Respublikasi Prezidentining matbuot xizmati

Oʻzbekiston Respublikasi Prezidenti Shavkat Mirziyoyev 8-sentyabr kuni Parlamentlararo ittifoq delegatsiyasi - ushbu nufuzli tuzilma raisi Duarte Pacheko va bosh kotibi Martin Chungongni qabul qildi.

Davlatimiz rahbari Oʻzbekistonning Parlamentlararo ittifoq bilan sermahsul hamkorligi jadal rivojlanib borayotganini katta mamnuniyat bilan qayd etdi.

Shu kunlarda Toshkent shahrida jahon mamlakatlari parlamentlari ayol rahbarlarining 14-sammiti muvaffaqiyatli oʻtmoqda. Uning kun tartibidan demokratik va ijtimoiy iqtisodiy yangilanishlarni qoʻllab-quvvatlashning samarali institutlarini rivojlantirish, gender siyosatni amalga oshirishga doir global va mintaqaviy ahamiyatga ega muhim masalalar oʻrin olgan.

Bundan tashqari, ushbu nufuzli xalqaro tashkilot bilan birgalikda qator muhim loyihalar amalga oshirildi, Buxoro shahrida Barqaror rivojlanish maqsadlari boʻyicha parlament forumi va boshqa tadbirlar oʻtkazildi.

Parlamentlararo ittifoqning yuqori darajali vakillari Oʻzbekiston yetakchisiga qoʻshma tashabbuslarni ilgari soʻrishda koʻrsatayotgan har tomonlama koʻmak uchun minnatdorlik bildirib, Yangi Oʻzbekistondagi yangilanishlar va islohotlar dasturini toʻliq qoʻllab-quvvatladilar.

Uchrashuvda barqaror rivojlanish, demokratik qadriyatlarni ilgari surish, yoshlarni qoʻllab-quvvatlash sohalaridagi maqsad va vazifalarga erishish, ittifoqning Innovatsiyalar markazi bilan hamkorlik qilish kabi yoʻnalishlarda oʻzaro manfaatli aloqalarni yanada kengaytirishga alohida eʼtibor qaratildi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?