Oʻzbekistonning Irlandiyaga yangi tayinlangan Favqulodda va Muxtor Elchisi Ravshan Usmanov mazkur davlat Tashqi ishlar va savdo vazirligi Protokol departamenti boshligʻi Ralf Viktoriga ishonch yorliqlari nusxalarini topshirdi. Bu haqida “Dunyo” axborot agentligi xabar berdi.

Bildirilishicha, tadbir davomida Oʻzbekiston va Irlandiya oʻrtasidagi hamkorlikni rivojlantirish istiqbollari boʻyicha fikr almashilgan.

Shuningdek, savdo-iqtisodiy, madaniy va turizm sohalarida aloqalarni jadallashtirish masalalariga ham alohida eʼtibor qaratilgan. Qishloq xoʻjaligi, IKT, farmatsevtika hamda qayta tiklanuvchi energiya sohalarini istiqbolli yoʻnalishlar sifatida qayd etilgan.

“Uchrashuv soʻnggida Irlandiya tomoni Oʻzbekiston elchisiga ikki tomonlama munosabatlarni rivojlantirish va kengaytirish yoʻlidagi ishlariga muvaffaqiyatlar tiladi”, — deyiladi agentlik xabarida.

Maʼlumot uchun, Ravshan Usmanov 2023-yilning 14-noyabr kuni Oʻzbekistonning Buyuk Britaniyadagi elchisi sifatida London shahriga kelgandi. 2024-yil 16-may kuni Buyuk Britaniya va Shimoliy Irlandiya Birlashgan Qirolligi Qiroli Charlz III ga ishonch yorliqlarini topshirgan. 2025-yil fevral oyida esa u bir vaqtning oʻzida mamlakatimizning birinchi elchisi sifatida Islandiya Prezidenti Xalla Tomasdottirga ishonch yorliqlarini topshirgan edi.