Avval xabar berganimizdek, Oliy Majlis Senatining Mudofaa va xavfsizlik masalalari qoʻmitasi raisi Qutbiddin Burxanov boshchiligidagi Oʻzbekiston delegatsiyasi Bryussel shahrida boʻlib turibdi.

Oʻzbekiston delegatsiyasi tashrif doirasida Yevropa Ittifoqi va Yevropa parlamenti vakillari bilan qator uchrashuvlar oʻtkazdi. Jumladan, Yevropa parlamentining Huquqiy masalalar boʻyicha qoʻmita raisi Ilhan Kyuchyuk bilan uchrashuvda ikki tomonlama siyosiy muloqot va parlamentlararo hamkorlikni mustahkamlash masalalari muhokama qilindi.

Belgiya Senati aʼzosi, “Belgiya–Oʻzbekiston” doʻstlik ligasi raisi Stefani DʼOz bilan boʻlib oʻtgan suhbat chogʻida parlamentlararo aloqalar va iqtisodiy hamkorlikni rivojlantirish istiqbollari koʻrib chiqildi.

Yevropa parlamentining deputati Tomas Zdexovskiy bilan uchrashuvda esa parlamentlararo muloqotni kengaytirish, mintaqaviy barqarorlik va iqtisodiy hamkorlikni kuchaytirish masalalari muhokama qilindi.

Shuningdek, parlamentlarning ixtisoslashgan qoʻmitalari oʻrtasida oʻzaro tajriba almashish orqali hamkorlikni rivojlantirish yuzasidan ham fikr almashildi.