Foto: “Dunyo”

Oʻzbekiston BMT Xavfsizlik kengashining 2035-2036-yillar uchun doimiy boʻlmagan aʼzoligiga oʻz nomzodini ilgari surdi. Bu haqda Oʻzbekistonning BMTdagi doimiy vakili, elchi Ulugʻbek Lapasov Xitoy raisligida BMT Xavfsizlik kengashining koʻp tomonlama va global boshqaruv institutlarini isloh qilish masalalariga bagʻishlangan yigʻilishida maʼlum qildi.

“Dunyo” axborot agentligining xabar berishicha, yigʻilishda Oʻzbekistonning BMT bilan oʻzaro hamkorlikning eng ustuvor masalalari boʻyicha rasmiy pozitsiyasi xalqaro hamjamiyatga yetkazilgan:

• Mamlakatning mintaqaviy hamkorlik muhimligi va Afgʻonistonni iqtisodiy tiklashdan manfaatdor ekani;
• transmilliy tahdidlarga, jumladan, giyohvandlik moddalarning noqonuniy aylanishi, terrorizm va uyushgan jinoyatchilikka qarshi kurashda BMT bilan hamkorlikni yanada kengaytirishga tayyorligi;
• Orol fojiasi oqibatlarini yumshatish maqsadida oʻrmonlar barpo etish, suvni tejash, qayta tiklanadigan energiya manbalaridan foydalanish borasida keng koʻlamli ishlar amalga oshirilayotgani;
• Orolboʻyida barqaror rivojlanishni xalqaro qoʻllab-quvvatlashni kengaytirish zarurligi alohida taʼkidlangan.

Shuningdek, yigʻilish ishtirokchilari Oʻzbekistonda amalga oshirilayotgan keng koʻlamli islohotlar bilan yaqindan tanishgan.

Aʼzo davlatlar 2025-yil iyun oyida Samarqand shahrida boʻlib oʻtadigan BMTning “Besh yil — 2030-yilgacha: Barqaror kelajak uchun davlat xizmatlarini koʻrsatishni jadallashtirish” mavzusidagi davlat xizmatlari forumiga taklif qilindi.