Foto: Qonunchilik palatasi matbuot xizmati

6-iyul kuni Xitoy Xalq Respublikasi Butunxitoy xalq vakillari kengashi Doimiy qoʻmitasi raisi Chjao Leszi boshchiligidagi parlament delegatsiyasi Oʻzbekistonga keldi. Bu haqda Oliy Majlis Qonunchilik palatasining matbuot xizmati xabar berdi.

Tashrif Samarqand shahridan boshlangan. XXR delegatsiyasiga Oliy Majlis Qonunchilik palatasi Spikeri Nuriddin Ismoilov hamrohlik qilmoqda.

“Keyingi yillarda Oʻzbekiston Respublikasi Prezidenti Shavkat Mirziyoyev va Xitoy Xalq Respublikasi Raisi Si Szinpinning yuksak siyosiy irodasi bilan hamkorlik aloqalari sifat jihatidan yangi bosqichga koʻtarildi. Xususan, oliy darajadagi uchrashuvlar muntazamlik kasb etib, savdo-iqtisodiy, investitsiyaviy va boshqa sohalardagi hamkorlik aloqalari jadal rivojlanmoqda. Tashrif davomida muzokara va uchrashuvlar oʻtkazish, ularda oliy darajada erishilgan kelishuvlarning ijrosini taʼminlash borasida parlamentlar oldida turgan vazifalarni muhokama qilish koʻzda tutilgan”, deyiladi xabarda.

Qayd etish joizki, Ostona shahriga amaliy tashrif doirasida 3-iyul kuni Oʻzbekiston Respublikasi Prezidenti Shavkat Mirziyoyev va Xitoy Xalq Respublikasi Raisi Si Szinpinning muzokaralari boʻlib oʻtgandi. Ushbu uchrashuvda koʻplab hamkorlik tarmoqlari koʻrib chiqilgan edi. Mazkur jarayonni yanada rivojlantirish maqsadida XXR delegatsiyasi tashrifi sodir boʻldi.

Avvalroq, Qonunchilik palatasi tomonidan qabul qilingan va 22-iyun kuni Senat tomonidan Oʻzbekiston hududida xorijda roʻyxatdan oʻtkazilgan siyosiy partiyalar faoliyati taqiqlangani haqda xabar bergan edik.