Malayziyaning Nilay shahrida velosportning trek yoʻnalishi boʻyicha kattalar, yoshlar va parasportchilar oʻrtasidagi Osiyo chempionati boʻlib oʻtmoqda.

Musobaqaning beshinchi kungi bahslari terma jamoamiz uchun muvaffaqiyatli boshlandi. Ayollar oʻrtasida tashkil etilgan medison dasturida Oʻzbekiston milliy terma jamoasi aʼzolari Nafosat Koziyeva hamda Asal Rizayeva yana kuchlilar qatorida boʻldi va hisobimizga navbatdagi medalni qoʻshib qoʻydi.

Ayni damda Oʻzbekiston milliy terma jamoasi hisobida 2 ta oltin va 3 ta bronza medallari mavjud.

Mahallada yangi sport inshooti

Toshkent viloyatining Quyi Chirchiq tumanidagi “Gul” MFY hududida zamonaviy sport zali hamda ikki qavatli maʼmuriy bino qurilib, foydalanishga topshirildi. Mahalla koʻrkiga-koʻrk qoʻshgan ushbu inshootlar Oʻzbekiston Respublikasi Sport vazirligi mablagʻlari hisobidan bunyod etildi.

Yangi tipdagi sport zalining oʻlchami 9x18 metr boʻlib, unda qator sport turlari bilan shugʻullanish va musobaqalar oʻtkazish mumkin.

Inshootning ochilish marosimida tuman hokimligi va viloyat sport boshqarmasi rahbariyati hamda keng jamoatchilik vakillari qatnashdi.

Yosh xokkeychilarimiz jahon chempionatida qatnashadi

Shu yilning 28-fevralidan 6-mart sanasigacha Taylandning Bangkok shahrida sportning xokkey turi boʻyicha jahon chempionati boʻlib oʻtadi.

Kuni kecha Oʻzbekiston milliy terma jamoasi aʼzolari (U-18) oʻsmirlar oʻrtasida boʻlib oʻtadigan jahon chempionatida ishtirok etish uchun Bangkok shahriga uchib ketishdi.

Uning doirasida 27-28-fevral kunlari qishki Olimpiya va Paralimpiya oʻyinlariga puxta tayyorgarlik koʻrish maqsadida oʻquv-mashgʻulot yigʻini ham boʻlib oʻtishi rejalashtirilgan.

Sport vazirligi axborot xizmati maʼlumotlari asosida

Oʻzbekiston davlat jahon tillari universiteti talabasi

Zebo JUMAYEVA tayyorladi.