Oʻqituvchi va 10 nafar shogird asarlari bir koʻrgazmada jo boʻldi

17:07 12 Yanvar 2021 Madaniyat
327 0

Sirdaryo viloyati Maʼnaviyat va maʼrifat markazida “Vatanimga mehrim — qalbim ranglarida” nomli ijodiy koʻrgazma ochildi. Koʻrgazmada viloyat ixtisoslashtirilgan sanʼat maktab-internati tasviriy sanʼat fani oʻqituvchisi Gʻanisher Normatov va uning oʻn nafar shogirdi moʻyqalamiga mansub rang-tasvir asarlari namoyish qilinmoqda. Ushbu tadbir “Yoshlarni qoʻllab-quvvatlash va aholi salomatligini mustahkamlash yili” hamda 14-yanvar — Vatan himoyachilari kuni munosabati bilan oʻtkazilayotir.

Asarlarning har birida — Vatan mavzusi ustuvor. U qaysidir suratda piru badavlat bobo boʻlib koʻrinsa, yana birida daryo mavjlari sifatida aks etadi.

— Ona Vatanimiz tasvirlari uchun mavzularni betakror tabiatimizdan, odamlarning taftli chehrasidan tanlayman, — deydi yosh rassom Oʻgʻiloy Abdumajidova. — Masalan, birgina oʻzbekona hovlining oʻzidan Vatanimizning oʻnlab faqat oʻzimizgagina xos chizgilarini topish mumkin.

Maʼlumot uchun. Sirdaryo ixtisoslashtirilgan sanʼat maktab-internatining 2020-yilgi bitiruvchilarining 70 foizi oliy oʻquv yurtlari talabasi boʻldi. Oʻqituvchi-ijodkorlarning 8 nafari Oʻzbekiston Badiiy akademiyasi aʼzosidir.

Diyora MISRALIYEVA

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?