Foto: Samarqand viloyati hokimligi

Mahmudov Temur Asomidinovich Samarqand viloyatining Oqdaryo tumani hokimi etib tayinlandi. Bu haqda viloyat hokimligi matbuot xizmati xabar berdi.

Maʼlum qilinishicha, bugun, 3-fevral kuni Xalq deputatlari Oqdaryo tumani Kengashining navbatdan tashqari sessiyasi oʻtkazilgan. Unda Samarqand viloyati hokimi Adiz Boboyev ishtirok etib, Oqdaryo tumanini ijtimoiy-iqtisodiy rivojlantirish borasida olib borilayotgan ishlar bilan tanishgan.

Rahbar, shuningdek, aholi turmush darajasini yaxshilash hamda bandligini taʼminlashda foydalanilmay kelinayotgan imkoniyatlar, masʼul rahbarlarning hamjihatlikda ishni tashkil qilmagani xususida toʻxtalgan.

Bugungi sessiyada tashkiliy masala koʻrilib, Sherzod Qudratov oʻz arizasiga koʻra, Oqdaryo tumani hokimi vazifasidan ozod etilgan. Shundan soʻng, viloyat rahbari Mahmudov Temur Asomidinovichni ushbu tumanga hokim etib tayinlash taklifini bildirgan. Nomzod deputatlar tomonidan maʼqullangan.

Maʼlumot uchun, Temur Mahmudov mazkur tayinlovga qadar Samarqand viloyati kambagʻallikni qisqartirish va bandlik boshqarmasi boshligʻi vazifasida faoliyat yuritib kelayotgan edi.