Xalqaro olimlar guruhi Sibir mamontining toʻqimalarini tahlil qilib, bu hayvonlarning oʻlimi sabablari haqida farazni ilgari surdi. Ularning fikriga koʻra, mamontlar allergiya qurboni boʻlishgan. Allergiya iqlim isishi tufayli paydo boʻlgan gulchanglardan boʻlgan.

Aksariyat olimlar mamontlarning yoʻq boʻlib ketishiga iqlim oʻzgarishi va qadimgi odamlarning faoliyati sabab boʻlgan deb ishonishadi. Biroq, muqobil versiyalar mavjud. Xususan, Isroil, Italiya va Rossiya olimlari Sibirning abadiy muzligida topilgan mamontlar qoldiqlarini oʻrganishdi. Hayvon toʻqimalarining tahlili shuni koʻrsatdiki, toʻqimalarda tirik organizmlarni viruslar, bakteriyalar va allergenlardan himoya qiluvchi immunoglobulin oqsillari mavjud.

Olimlar mamontlar toʻqimalarida topilgan immunoglobulinlarni oʻsimlik gulchanglariga allergik reaksiyaning namoyon boʻlishi bilan bogʻlashdi.

Olimlarning fikricha, iqlim isishi tufayli oʻsimliklar uchuvchi organik birikmalarning yangi turlarini ishlab chiqara boshlagan. Bu esa oʻz navbatida oʻsha paytda Yerda yashagan faunada hid sezish bilan bogʻliq jiddiy muammolarni keltirib chiqargan.

Hid hissi hayvonlarning suv va oziq-ovqat izlash jarayonida muhim rol oʻynaydi. Lekin oʻsimlik gulchanglari, olimlarning fikriga koʻra, surunkali allergik reaksiyalarni keltirib chiqarishi mumkin. Bu esa pirovardida hayvonlarning hayotiyligiga salbiy taʼsir koʻrsatgan.