Turkiya va Oʻzbekiston Ichki ishlar vazirliklari hamkorligida oʻtkazilgan tezkor tadbirlar natijasida odam savdosi jinoyatini sodir etganlikda ayblanib qidiruvda boʻlgan 1974-yilda tugʻilgan fuqaro R.S. Oʻzbekistonga deportatsiya qilindi. Bu haqida Oʻzbekiston Respublikasining Istanbul shahridagi Bosh konsulxonasi xabar berdi.

Unda aytilishicha, “Sonya” laqabi bilan tanilgan fuqaro R.S. 2013-2015-yillarda Bangkok shahrida fohishaxona tashkil etib, vatandosh ayollarni yuqori daromadli ish vaʼdasi bilan aldab, Qozogʻiston orqali Tailandga olib borib fohishalik qilishga majburlagan jinoiy guruh tarkibida faol ishtirok etganlikda ayblangan.

“Mazkur shaxsning noqonuniy xatti-harakatlaridan jabrlangan fuqarolarni Oʻzbekiston Respublikasi Ichki ishlar vazirligi yoki uning quyi tizimlariga, shuningdek, Istanbuldagi Bosh konsulxonaga murojaat qilishga chaqiramiz”, — deyiladi xabarda.

Shuningdek, Bosh konsulxona soʻnggi vaqtlarda firibgarlik holatlari boʻyicha murojaatlar koʻpaygani sababli, fuqarolarimizni firibgarlarga aldanib qolmasliklarini va ogoh boʻlishlarini soʻragan.