Xabaringiz bor, feysbuk ijtimoiy tarmogʻida fuqaro Farida Rashidova tomonidan Navoiy shahrida joylashgan 32-sonli maktabgacha taʼlim tashkiloti sharoitlari xarob, isitish tizimi ishlamayotgan boʻlsada, bolalarni tarbiyalash davom etayotganligi, ushbu muammolar yuzasidan masʼullarga murojaat qilishgan boʻlsada, hech qanday amaliy harakat qilinmaganligi boʻyicha xabar qoldirilgan edi. Ijtimoiy tarmoq foydalanuvchi oʻz xabarida muammoni hal etishda yordam berilishini soʻrab murojaat qilgan.

Mazkur murojaat Bolalar Ombudsmani nazoratiga olinib, Navoiy viloyati hokimiyatiga murojaat qilindi. Bu haqda Oliy Majlisning Inson huquqlari boʻyicha vakili (ombudsman) Axborot xizmati xabar berdi.

Navoiy viloyati maktabgacha taʼlim boshqarmasi tomonidan taqdim etilgan maʼlumotlarga koʻra, shaharning “Orzu” MFY hududidagi mazkur 360 oʻrinli MTTning bino-inshootlari 1970-yilda qurilgan boʻlib, foydalanishga topshirilganidan buyon biror marta ham mukammal taʼmirlanmagan faqatgina joriy taʼmirlash ishlari olib borilgan.

Mazkur idoraning xabar berishicha, ijtimoiy tarmoqqa joylashtirilgan videolar ancha ilgari tasvirga olingan. 32-sonli maktabgacha taʼlim tashkilotining xabarda koʻrsatilgan kamchiliklarini bartaraf etish boʻyicha ishlarning bir qismi 2022-yilning 12-yanvar oyida bajarilgan.

Bolalar Ombudsmanining aralashuvi bilan shahar MTBning ekspluatatsiya xodimlari tomonidan muassasa isitish tizimi qayta tiklanib, kamchiliklar bartaraf etilgan. Jumladan, MTTdagi issiqlik tizimi qayta koʻrib chiqilib, barcha guruhlarda bartaraf etilishi taʼminlangan, teshilgan suv quvuri taʼmirlangan, san uzel, yoʻlaklar va boshqa joydagi kamchiliklar ham bartaraf etilgan.