Qudratilla Najmiddinov/«Xalq soʻzi». Namangan muhandislik-texnologiya institutida “Fizik tadqiqotlar va muhandislik texnologiyalari muammolari” (PRETP – 2024) xalqaro ilmiy anjumani oʻtkazildi. Unda oʻndan ortiq mamlakatlardan, jumladan, Zambiya, Belarus, Malayziya, Hindiston, Bangladesh kabi davlatlardan yetakchi olimlar oʻz ilmiy maqolalari bilan ishtirok etdi. Ishtirokchilar taʼkidlaganidek, tadbir ilmiy hamkorlikni xalqaro darajada mustahkamlash, yangi gʻoyalar va texnologiyalarni rivojlantirish uchun muhim platformaga aylandi. Chuqur poydevorli maʼruzalar va munozaralar fizika va muhandislik sohalarida yangi izlanishlarni ragʻbatlantirishga qaratilgan boʻlib, anjumanning ilmiy darajasini yanada oshirishga xizmat qildi.

– PRETP – 2024 singari anjumanlar biz olimlar uchun ulkan imkoniyatlar eshigini ochadi, – deydi Malayziyadan tashrif buyurgan taniqli olima Sakina Abdulloh. – Bu yerda biz nafaqat yangi ilmiy natijalar bilan tanishib qolmay, global muammolarni birgalikda hal qilishga yoʻnaltirilgan innovatsion loyihalar oʻrtaga tashlandi. Namangan muhandislik-texnologiya institutida tashkil etilgan ushbu tadbir mintaqaviy hamkorlikni kuchaytirib, ilmiy izlanishlarimizni yangi bosqichga olib chiqadi, deb ishonaman.

Anjumanda koʻtarilgan masalalar, jumladan, yangi texnologiyalarni joriy etish, fizik tadqiqotlar sohasidagi yangiliklar va ilmiy innovatsiyalar boʻyicha munozaralar olimlar oʻrtasida keng muhokama qilindi. Ular bu yerda tilga olingan yangi ilmiy kashfiyotlar va innovatsion loyihalar oʻzaro hamkorlikni yanada kengaytirishga turtki boʻlishini alohida taʼkidladi.