Yangiliklarga toʻla zamonamizda odamlarni hayratga solish oson emas. Biroq, Uchqoʻrgʻon tumanining “Paxtachi” mahallasida yashovchi Ahrorbek Qoʻchqorovning tomorqasida yetishtirilgan oshqovoq hali pishmay turib 50 kilodan koʻproq tosh bosayotgani chindanam hayratomuz.

—Hajmining yirikligi bilan ajralib turadigan bu oshqovoqning urugʻini hamqishlogʻimiz Sherali Xayitov bultur Rossiyadan olib kelgandi, — deydi A. Qoʻchqorov. – Ishim koʻpligidan qarovini joyiga qoʻya olmadimmi tukkan mevasi 30 kiloga yetdi xolos, ekib koʻringchi, deya menga tavsiya qildi. Tomorqamizning bir chetiga qadalgan 10 ta urugʻning 8 tasi unib chiqdi. Ularni asosan otam parvarishlayaptilar.

Tajriba koʻrgan insonning dehqonchiligi boshqachada. 65 yoshli Azimjon ota koʻchatlarga butun mehrini berib qaradi. Natija hozirdanoq maʼlum. Ota-bolaning aytishiga qaraganda, oshqovoqlar toʻla pishib yetilsa, har birining vazni 80 kilogacha yetadi.

Qoʻchqorovlar ovozasi butun viloyatga tarqalgan oshqovoqpolvonning urugʻini olgandan soʻng qolgan et qismini qoʻni-qoʻshni, qarindosh-urugʻlarga ehson qilmoqchi. Kelgusi yildan esa Uchqoʻrgʻon tuprogʻini yoqtirib qolgan ushbu ekinni ommalashtirib, oilaviy biznesning asosiy turiga aylantirishni niyat qilishgan.

Qudratilla NAJMIDDINOV,
“Xalq soʻzi”